ЧИ МЕКТЕБРА

Каспийск шегьердин мектебра кIел­завай аялрин арада гьар йисуз, “Расул Гьамзатован йикъар — “Лацу дурнаяр” лишандик кваз, чIехи шаирдин шиирар устадвилелди кIелунин рекьяй конкурсар тешкилзава.

ЦIинин йисан конкурсда чи ватанэгьли руш, 8-нумрадин лицейдин 6 “г” класс­дин ученица   Гуьлженет  Гьажимирзоевади  2-чка кьуна. Ада конкурсдин жюридин вилик урус чIалал шаирдин “Диде” тIвар алай шиир кIелунай вичин устадвал къалурна ва гъалибчидин шабагьни къачуна.

Гуьлженета, урус чIалай ва литературадай хьиз, амай предметрайни вичихъ бажарагъ авайди чирзава. Рушан чIехи бу­ба Шагьисмаил Гьажимирзоев чи газетдин яшлу къуллугъчийрикай сад я.

Чна, гьелбетда, рушаз вичиз, адаз тарс гузвай муаллим Гуля Гьажиевнадиз, диде-бубадиз ва чIехи бубадиз  и агалкьун мубаракзава.

Агъадихъ чна а шиир лезги чIалаз таржума авуна чапзава.

Расул Гьамзатов

Диде

Урус чIалал — “мама”, гуржи чIалал — “нана”,

Авар чIалал назикдаказ лугьузва “баба”.

Чиле-цава авай вири гафарик вуна

Кьабулнава ажеб кьисмет, гьакьван чаз багьа.

 

Сад лагьай гаф, къвезвай мецел, амаз кьепIина,

Гагь-гагь ви ван къведа гурлу гумарин цIарцIяй.

Эхь, аскердин, хире кузвай къизгъин женгина,

Эхиримжи гаф яз къведа ракъизвай мецяй…

 

Явашдаказ нефес къачуз, рикIик кваз азаб,

Къалур тийиз  са куьнизни вилин туькьуьл нагъв,

За лугьуда: “Диде, на жув ийимир кабаб,

Вири крар хъсан я зи, виринра я сагъ…”

 

Хцинди я авай къайгъу, гьар са кар, багьна.

КIанивилин къуллугъдаллай къаравуш зурба.

Урус чIалал — “мама”,  гуржи чIалал — “нана”,

Авар чIалал назикдаказ лугьузва “баба”…

Авар чIалай.

Таржума Мерд  Алидин

Марьям

Зул

КIандач заз зул, ихьтин мекьи йикъарни,

Пеш вегьена, чуплах хьанвай тарарни.

Рагъ аквазмач циферикай цавайни,

Дагъдин синел атанва циф чиляйни.

 

Катна фена гатун чими йикъарни,

Чилик тадач халкьди турпни, газарни.

Муьхцерив векь агудда, гьакI самарни,

Йифер яргъи, къалин жеда крарни.

 

Къирав яда чуьллеризни тамариз,

Кьери хьайи булахравай ятариз.

Гьич хуш амач мани ядай нуькIериз,

Гьахьнава зул чи рикIерин гьиссериз.

 

Зулун гарни акъвазнава гьуьжетиз,

Хъипи пешер тазва цава гьелекиз.

Язух жезвач къай кваз къвайи марфариз,

ТIебиатди икрамзава цавариз…

МискIалар

Школадиз талукь затIарикай

Гьуьсейн Рамазан

Са кIвачелла буш келле,

Мефт авайди туш къене.

Элкъведа ам ацукьна,

Вири дуьнья алукIна.

• § §

РикI — цIивин,

Як — верхин.

Хам цIалцIам

ЗатI я ам.

• § §

Чидайди я квез суфра,

Лазим къвезвай мектеб­ра­­­.

Кхьиз, чIуриз квай цлак,

Пис къилихар жеч адак.

• § §

Ам пайдахдин бала я,

Чаз виридаз ала я,

Жуван чан хьиз, намус хьиз,

Алахъа хуьз ам михьиз.

• § §

Ругуд юкъуз физ,

Са юкъуз тефиз.

Рекье — далудал,

КIвале — столдал.

• § §

Лацу никIе —

Яру къанал.

Муьгъ алай туш

Фидай анал.

• § §

ГъалатI тийиз, теклиф ийиз,

Дидеди хьиз эверда.

Ара атIуз, гьа са мани

Чун паталди эзберда.

• § §

Са дуст ава гудай чирвал,

Лугьудай ваз вири тирвал.

Це гьамиша на адаз яб,

Лугьуда хьи адаз…