* * *
“Мавел” чапханада гьа са йикъара шииратдин кьве ктаб акъатна: “Илгьамдин булахар”, “Уьмуьрдин рекьер”. Сад лагьай кIватIалда гьатнавай 24 автордин алакьунриз дикъет гайила аквада хьи, абурукай гьар сад са булах хьиз (чIехи ва я гъвечIи) арадал атанва, милли эдебиятдик чпин сес кутаз алахънава.
Ктабдин авторрикай Сейфудин Шагьпазован, Юрик (Юрмет) Нагъиеван, Марьям Алискеровадин, Жульета Омаровадин, Владик Батманован, Гуьлжагьан Мисрихановадин, ктабдин редактор ва туькIуьрайди тир Гуьзеля Гьасановадинни эсерар “Лезги газетдиз”, маса изданийризни акъатна, кIелзавайбуру абур хушдиз, “илгьамдин булахар” хьиз кьабулнава. И ктабни гьа дережадинди я.
Ада чаз хейлин цIийи тIварарни чирзава: Терана Керимова, Тубуя Мегьамедбегова, Зарема Девришева, Элмар Саруханов, Тамила Салманова, Гулфия Пашаева, Хавер Шафиева, Гьамзат Усманов ва мсб. Эгер са ктабди икьван цIийи тIварар чирзаватIа, им генани тарифдай кар я.
* * *
Гуьлжагьан Мисрихановадин нубатдин ктабдиз “Уьмуьрдин рекьер” тIвар ганва. Чна фикирзавайвал, авторди ам вичин 60 йисан юбилейдихъ галаз алакъалу яз акъуднава.
Ктабдиз сифте гаф кхьенвай лезги писателрин Союздин правленидин председатель Максим Алимовани и кар къейднава: “Иншаллагь, шаирвилин четин рекьиз экъечIнавай Гуьлжагьан вах чIехи дережайрив агакьда…”
Чи мухбир