Алай йисан сентябрдин сифте кьилера зун кефсуз хьана. Къунши, зи мирес, Цналрин юкьван школадин муаллим Рамазанов Лазира зи рикIин гьерекат ахтармишна. Адай гьарай акъатна. Дамарра ивидин гьерекат лап йигин хьанвай. “Тади гьалда больницадиз агакьарна кIанда”, — лагьана ада. Хуьруьн кьегьал жегьил Агьмедов Рамазанан машинда аваз зун Кьасумхуьруьн больницадиз гъана.
Начагъбур кьабулзавай кабинетда лацу халатар алайбурун — духтурринни медсестрайрин — гьуьрмет, мергьяматлувал ва начагъдахъ галаз авай рафтарвал акурла, зи рикIизни чандиз са бубат регьят хьана.
Абуру зи гьал ахтармишна, ахпа хъуьчIерикай кьуна, 3-мертебада кардик квай терапиядин отделенида къаткурна, капельницадик кутуна.
Пакадин юкъуз зи кефияр ачух, кьилинни бедендин тIал секин хьана. Палатада чун, азарлуяр, пуд кас авай.
Пакамаз чи палатадиз терапиядин отделенидин заведующий Эльвира Мирзеханова ва медсестра Индира Гьабибулаева атана. Абур заз ва вири начагъбуруз килигна. РикIин кIвалах, дамарра ивидин гьерекатдин йигинвал ахтармишна, хабарар кьуна, начагъбурун тIал-квал чирна.
Абур экъечIайла заз палатадин юлдашри ина ихьтин кьил чIугунар (обходар) гьар юкъуз жезвайдакай лагьана. Са арадилай больницадин кьилин духтурни галаз са десте духтурарни атана, чи гьалдикай хабарар кьуна, теклифар, меслятар гана.
Пакадин йикъан нисинихъ зун больницадин гьаятдиз экъечIна. Къекъвена, больницадин дараматриз, гьаятдиз, аллеядиз килигна.
Маншаллагь, больницадихъ хъсан регьбер, туькIвей коллектив авайди ва райондин кьиле авай ксарини иниз еке фикир гузвайди аквазва. Ина вири кабинетра, палатайра экуьвал, михьивал, чимивал ава. Вири жуьредин медицинадин тадаракралди таъмин я.
Зун больницада цIувад йикъалай виниз хьана. Заз мукьвал-мукьвал къвез килигай, рапар ягъай, капельницадик кутур, ширин мецелди зун руьгьламишай медсестра Индира Гьабибулаевадиз, зун сагъаруник чпин пай кутур вирибуруз за рикIин сидкьидай чухсагъул, баркалла лугьузва.
Г. Къазимегьамедов,
Цналрин хуьр
