“РусГидро” ПАО-дин Дагъустандин филиалди и йикъара Каспийск шегьерда “оБЕРЕГАй” серенжем кьиле тухвана. И сеферда Каспийскдин жегьил натуралистрин станцияда чирвилер къачузвай аялри шегьердин къерехда авай “Маяк” пляждилай гьар садан заланвал юкьван гьисабдалди 8 килограммдиз барабар тир 180 шешелдилай гзаф зирзибил кIватIна. Санлай пляждай 1,5 тонн зирзибил кIватIна. Гьуьлуьн къерехда ял ядай чка тир инай виридалайни гзаф ламу чарар (салфеткаяр) кIватIна. Кьвед лагьай чкадал пластикдин ва шуьшедин бутылкаяр ала, пуд лагьайдал — полиэтилендин пакетар. Анай гьуьлуьн къерехдиз гадарнавай балугъар кьадай чилерни жагъана.
“РусГидро” ПАО-дин Дагъустандин филиалдин пресс-секретарь Эмилия Казумовади хабар гайивал, къакъаждай чка яз “Маяк” пляж хкягъун дуьшуьшдин кар туш. Каспийскдин агьалийри шегьердин пляжрал мукьвал-мукьвал субботникар кьиле тухузва, гьа са вахтунда шегьердин къерехда авай ял ядай чкаяр гьикI хьана михьзава. Гьуьлуьн къерех михьунин серенжемда 50 аялди иштиракна. Абуруз и карда диде-бубайри ва муаллимрини куьмек гана.
Хъсан адетдиз элкъвенвай “оБЕРЕГАй” серенжем республикада 2007-йисалай тухуз башламишна. Алатнавай йисарин вахтунда ада Каспийск, Махачкъала шегьеррин, гьакIни Чиркей, Гельбах, Бавтугай ва Унцукул районрин ва са жерге маса хуьрерин са шумуд агъзур аялди иштиракна. Абуру кIватIнавай зирзибил хъуртарив агакьарун патал пар чIугвадай 30 машин лазим атана. Къейд ийин, алатай йисуз цин гьамбарханайрин къерехар михьиз хуьнихъ элкъуьрнавай и серенжемда ДГУ-дин экологиядин ва дурумлудаказ виликди финин факультетдин студентри иштиракнай. Абуру Дагъустандин агьалийрин ва республикадин мугьманрин рикI алай ял ядай чкайрай — Дубкидин ва Самурдин тамарай тоннралди зирзибил кIватIнай.
«Лезги газет»
