17-октябрдиз Махачкъаладин Милли библиотекадин дараматда Вирироссиядин теплицайра гьасилзавай суьрсетдин “Вири теплицаяр патал я” — “Даг-Агро — 2019” выставка кьиле фена. Ам илимдин “Дагъустандин теплицаяр” ассоциацияди ва республикадин выставкайрин “Дагъустан — ЭКСПО” центради региондин хуьруьн майишатдин ва недай суьрсетдин министерстводихъ галаз санал тешкилнавай.
Выставкадал уьлкведин жуьреба-жуьре регионрай тир 60 компанияди чпин суьрсет, гьакIни теплицаяр эцигунин ва хуьруьн майишатдин суьрсет гьасилунин рекье алай аямдин эхиримжи цIийивилер майдандиз акъудна. Идалайни гъейри, “Россельхозцентр” ФГБУ-дин республикада авай филиалди агалнавай чилел гьасилзавай набататар азаррикай хуьдай алай аямдин цIийи къайдаяр теклифна.
Дагъустандин патай выставкада Агромир, Дагагрокомплекс, КФХ “Тепличный” ва маса карханайри иштиракна.
Выставкадиз мугьман хьайи РД-дин хуьруьн майишатдин ва недай суьрсетдин министр Абзагьир Гьуьсейнова мярекатдал майдандиз акъуднавай теплицаяр патал тадаракриз, алатриз ва тумариз виниз тир къимет гана.
Мярекатдин сергьятра аваз Дагъустанда агалнавай чилерал набататчивал вилик тухунин месэладай заседание кьиле фена. Ана республикадин хуьруьн майишатдин суьрсет гьасилзавайбуру, “Дагъустандин теплицаяр” Ассоциациядин, фермервилин майишатрин ва хуьруьн майишатдин кооперативрин, Россельхознадзордин Управленидин, Дагъустандин аграрный университетдин векилри иштиракна.
Абурун вилик рахадайла, А.Гьуьсейнова къейд авурвал, Дагъустан Республикадихъ набататчивилин хел гегьеншдаказ виликди тухун патал тIебиатдин къулай шартIар ава, гьасилзавай майвайрин кьадардал гьалтайла, республикади Россиядин амай регионрин арада вилик жергеда чка кьунва. Кьилди къачуртIа, адан гафаралди, республикади майвайралди хсуси игьтияжар тамавилелди таъминарзава ва 500-600 агъзур тонн маса регионризни тухузва.
“2018-йисуз майвайрин бегьердин санлай къачур кьадар 1 миллионни 438,5 агъзур тонндиз барабар хьанай, и рекъемдин 3,9 процент теплицайра гьасилнавай майвайри тешкилзава. Республикада теплицайри кьунвай майданар йисалай-суз гегьенш жезва, 2018-йисан эхирра абуру 593 гектардин чил кьунвай”, — хабар гана министрди.
Заседанидал рахайбуру разивилелди къейд авурвал, сифтедай и кар гъиле кьун патал са кьадардин такьатар лазим ятIани, агалнавай чилин набататчивал иллаки хийирлу хел я. Гьаниз килигна ам республикада къвердавай гзаф майданриз чкIизва.
Мярекатдал рахай “Россиядин теплицаяр” ассоциациядин директор Наталья Роговади и хиле кадрияр — теплицайра майваяр гьасилунин пешекарар бес тежезвайдакай лагьана. Адан гафаралди, и месэла неинки Дагъустанда, гьакI маса регионрани хцидаказ акъвазнава. Гьаниз килигна, уьлкведин аграрный вузри и хилен пешекарар гьазурун патал къайгъу чIугунва.
Форумдин сергьятра аваз гьакIни элкъвей стол ва хуьруьн майишатдин суьрсет гьасилзавайбур патал тежриба хкаждай мярекат тешкилнавай.
Жасмина Саидова
