1-2-ноябрдин йикъара Дагъустандин меркезда Индонезиядин йикъар кьиле тухуда, хабар гузва РД-дин карчивилин ва инвестицийрин рекьяй Агентстводи.
Мярекатда Россиядин Федерацияда Индонезиядин посол Могьамад Вагьид Суприядиди, Дагъустандин кьиле авай ксари, министерствойрин векилри, карчийри иштиракда. Адан сергьятра аваз форум, алакъайрин биржа кьиле тухуда, Индонезиядин шей гьасилзавайбурун мумкинвилерихъ, гьакIни выставкадин кIвалахда иштиракдай а уьлкведин компанийрин суьрсетдихъ галаз таниш жеда.
Агентстводи гьисабзавайвал, международный мярекатди къецепатан уьлквейрин компанийрихъ галаз алакъаяр тайинариз, цIийи амадагар ва я муьштерияр, инвестицийрин чешмеяр жагъуриз куьмек гуда ва Дагъустанда гьасилзавай суьрсет къецепатан уьлкведин базардиз акъуддай рекьер ачухда.
“Индонезиядихъ галаз алакъада аваз кIвалахуниз итиж ийизвай Дагъустандин карханайрин векилриз анин зурба карханайрин ихтиярар ганвай менеджеррихъ галаз шей маса гунин-къачунин гьакъиндай арада кас авачиз рахунар кьиле тухудай мумкинвал ава. И месэладиз итиж ийизвай карчийривай Индонезиядин векилрихъ галаз гуьруьшмиш хьун патал электронный opvdis@yandex.ru адресдиз кхьейтIа жеда”, — малумарзава Агентстводин векилди.
«Лезги газет»
