Са шумуд югъ идалай вилик Каспийскда дзюдодай шегьердин кIвенкIвечивал къазанмишун патал 2009 ва 2010-йисара дидедиз хьанвай аялрин арада акъажунар кьиле фена. Ана шегьердин спортзалра спортдин сирер чирзавай 100-дав агакьна жаванри единоборствойрин виридалайни машгьур жуьредай чпихъ авай алакьунар къалурна. Акъажунар лагьайтIа, заланвилин са шумуд категориядай кьиле фена. ГъвечIи пагьливанрин бягьсериз тамашиз атанвайбурун кьадарни тIимил тушир.
21 кг-дин заланвал авай спортсменрин арада 2-чкадиз чи гъвечIи ватандаш (адан чIехи бубайрин ери-бине Кьурагь райондин Бахцугърин хуьряй я) Шамил Гьажимирзоевни лайихлу хьана. Сифте кьве бягьсина Шамила вичихъ галаз гьасирдал экъечIайбурун винел инанмишвилелди гъалибвал къазанмишна. Финалдин бягьс са очкодин тафават аваз акьалтIна.
Къейд авун лазим я хьи, дзюдодал машгъул жез алатнавай са куьруь вахтунда Шамила кьвед лагьай сеферда гъалибвал къазанмишнава. ИкI, тахминан са варз идалай вилик ам вичин яшарин аялрин арада дзюдодай акъажунра Кубокдиз лайихлу хьана.
Малум хьайивал, Ш.Гьажимирзоева Каспийскдин Агьмедхан Султанан тIварунихъ галай 8-нумрадин лицейда 2 “г”-классда хъсан къиметар аваз кIелзава. Дзюдо Шамила вичин виридалайни рикI алай спортдин жуьре тирвиляй хкяна. Алай вахтунда ада “Чирагъ” тIвар алай спортзалда тренер Тагьир Жанибегован гъилик вердишвилер къачузва. Тренерди гъвечIи пагьливанди вич гьасирдал тухузвай ва тренировкайрив рикI гваз эгечIзавай саягъдиз килигна, аялдихъ спортдин и жуьредай экуь гележег аваз гьисабзава. Чи мурадни гъвечIи пагьливандихъ мадни еке дережаяр хьун я.
Рагнеда Рамалданова
