Консалтингдин Henley&Partners  компанияди хабар гузвайвал, эхиримжи 10 йисан вахтунда Россияди вичин агьалийривай виза галачиз физ жедай уьлквейрин кьадар 2 сеферда артухарнава.

Компаниядин пешекарри дуьньядин гьи уьлквейрин агьалийривай гьикьван государствойриз визайрин къайда авачиз физ жедатIа ахтармишна ва талукь тир сиягь туькIуьрнава.

Сад лагьай чкадал Япония ва Сингапур ала —  и уьлквейрин агьалийриз  дуьньядин 189 уьлкведиз виза авачиз фидай ихтияр­ ава. Кьвед лагьай чка Кьиблепатан Кореяди, Германияди ва Финляндияди (187 уьлкве — гьардаз), пуд лагьайдал Дания, Италия ва Люксембург (186 уьлкве — гьардаз)  ала.

Россия и сиягьда 51-чкадал ала — чи ватанэгьлийриз  дуьньядин 116 уьлкведиз  виза къачун тавуна фидай ихтияр ава. Пешекарри рикIел хкизвайвал,  2009-йисуз ихьтин уьлквейрин кьадар 60-даз барабар тир. РикIел хкин, гьеле алай йисан 2-кварталда Россия 47-чкадал алай, амма Джибутиди ва Бенинди  визайриз талукь яз тухузвай сиясат кIевиди авун себеб яз, чун сиягьда агъуз аватна.

109 уьлкведикай ибарат сиягьдин эхирда Афгъанистан ава — адан агьалийривай виза авачиз анжах 25 уьлкведиз физ жезва­.

«Лезги газет»