Дагъустанда 2020-йисан бегьер патал зулун магьсулрин 22,4 агъзур тонн тумарин игьтияж ава. Россельхозцентрадин Дагъустандин филиалди хабар гузвайвал, республикада алай вахтунда 5,2 агъзур тонн тумарин ери ахтармишнава, абурукай 4,9 агъзур тонн (94 процент) ерилубур яз гьисабнава.
“Тумарин ерилувилелай ва абур дуьздаказ гьазурунилай гележегдин бегьердин кьадар ва ери аслу я. Гьа са вахтунда Дагъустанда цазвай тумари ГОСТ-дин истемишунризни жаваб гун лазим я”, — хабар гузва идаради.
Къейдзавайвал, республикадин хуьруьн майишатдин ва недай суьрсетдин министерстводи ва Россельхозцентрадин республикада авай филиалди санал кьабулзавай серенжемрин нетижада виниз тир еридин тумар цанвай майданар йисалай-суз артухариз алакьзава.
4-октябрдин делилралди, пландик квай 95 агъзур гектардикай 15 агъзур гектардин майданра зулун тумар цанва.
«Лезги газет»
