Чи ватанэгьлияр — гьар сана

Яргъарай чав мад са ватанэгьлидикай — Эльмар  Нурмамедовакай  — хабар агакьна. Ам 1979-йисан 5-июлдиз КцIара дидедиз хьана, ана 2-нумрадин мектебда 8-классдал кьван кIел­на. Алай вахтунда США-дин Мас­сачусетс штатда ава.

1993-йисуз ада Къуба шегьерда туьркерин лицейда кIелун давамарна, ана адаз туьрк ва ин­гилис чIалар чир хьана. Гуьгъуьнин кьуд йисуз ада датIана тIебии илимриз итиж авуна. Стоматологиядин рекьяй кьилин образование къачунатIани, гуь­гъуьнлай ада и рекьяй мадни ви­лик фин давамарнач. Же­гьилди молекулярный биоло­гиядиз дериндай фикир гуз га­тIун­на. 1997-йисуз адакай Анкарадин Ближневосточный технический университетдин биологиядин факультетдин студент хьана. ИкI, цIийи хиляй хъсан чирвилер къачунин мурад авай жегьилдиз вич ахтармишдай, кьатIунринни саваддин алем еримлу ийидай мумкинвал хьана. 2001-йисуз ада вуз тафа­ватлувилелди акьалтIарна, бакалаврдин дережа къачуна. Гьа и йисуз ада Швециядин институтдин патай тамам стипендия къачуна ва адаз и уьлкведин Лунд шегьердин университетдин экологиядин илимрин ре­кьяй магистерский программада иштиракун теклифна. И программади Эль­мараз вич жуьреба-жуьре терефрай, гьа жер­гедай яз сиясатдин, экономикадин рекьяйни еримлу ийидай, кьатIунринни чирвилерин сер­гьятар гегьеншардай мумкинвал гана. Диссертация хвейидалай кьулухъ, 2003-йисуз, Эльмар Нурмамедова магистрвилин дережа хвена.

Германиядин Кельн шегьерда Макс Планкан институтда са шумуд вацра хьуникди Эльмара­ илимдин рекьяй вичихъ авай чир­вилер тежрибадани ахтармишна. Гуьгъуьнлай адаз Лунд шегьердин университетдин молекулярный биофизикадин кафедрада илимдин къуллугъ теклифна. Кьуд йисуз ана ахтармишунар тухвайдалай кьулухъ жегьил пешекарди биохимиядин рекьяй докторвилин дережа хвена.

2010-йисуз ватанэгьли США-дин Массачусетс штатдин Бостон шегьердиз куьч хьана ва Гарвардский медицинадин мектебда ада илимдин рекьяй кIвалах давамарна.

Лезги алимдин ахтармишунрин кIвалахар талассемия, серповидно-клетчатый анемия хьтин азарар сагъардай цIийи къайдаяр еримлу авунихъ галаз ала­къа­­лу я. Адахъ и хиляйни, гьакI медицинадин химиядин рекьяйни кIвалахар давамардай ният ава. Алай вахтунда ам илимдин машгьур вад кIвалахдин ва са патентдин автор я.

Гьазурайди — К.Ферзалиев