Ирид къажгъан — ирид къулал,
Биргендар кьвед суфрад кьулал,
Вун гьинавай икьван чIавал?
Вун накь вучиз атаначир?
(Сажидин Саидгьасанов)
Винидихъ тIвар кьунвай “Тарки-Тау — 2019” ярмаркадин мярекатрик кваз, чна виликамаз хабар ганвайвал, алай йисуз чпин юбилеяр къейдзавай 4 автордин жергеда аваз, шаир, драматург, РФ-дин писателрин ва журналистрин союзрин член, РД-дин культурадин лайихлу къуллугъчи, Дагъустандин жегьилрин насигьатчи Сажидин Саидгьасанован “Вун накь вучиз атаначир?” ктабдин презентацияни кьиле фена. Мярекатра Дагъустандин жуьреба-жуьре халкьарин интеллигенциядин векилри, студентри, литературадал, хайи чIаларал рикI алай хейлин ксари иштиракна. Президиумда Дагъустандин ктабрин издательстводин директор М.Омаровади ва адан заместитель, кьилин редактор Л.Голубевади чкаяр кьунвай.
Мярекат президиумдин членри алай йисуз чпин юбилеяр къейдзавай Дагъустандин писателрикайни шаиррикай, Дагъустандин ктабрин издательстводи абурун юбилейриз талукь яз акъуднавай ктабрикай куьруь гаф лугьуналди ачухна. Малум хьайивал, цIи 52 юбиляр ава, абурукай анжах 20-дан ктабриз экуь дуьнья аквада (сад квачиз, амайбур вири чапнава).
Сажидин Саидгьасанован ктабдин презентация авторди “Вун накь вучиз атаначир?” шиир кIелунилай башламиш хьана. Шаирди вичин уьмуьрдин рекьикайни куьруь суьгьбетна.
С.Саидгьасанован цIийи ктабдикай Сулейман-Стальский райондин кьил, филологиядин илимрин кандидат Нариман Абдулмуталибова пара чими келимаяр лагьана.
— Ктаб лап хъсанди, туькIвейди хьанва. Сажидин Саидгьасановаз вири патарихъай пай ганва — ам мискIиндин имамни я, устIарни, активнидаказ вири месэлайрик шерик жезвай касни, чун вири патал бубани я. Ада райондин телевиденида чIугвазвай зегьметдихъ еке метлеб ава. Адахъ “Дагъустандин халкьдин шаир” лагьай тIвар авачтIани, ам и дережадиз фадлай лайихлу кас я. ГьикI хьи, ада халкьдин чIалал кхьизва. Гьар са гафуналди, гьар са фикир-келимадалди культура, чIал хуьниз эвер гузва. Ам уьмуьрдиз экуь вилерай килигзавай, неинки са хайи, гьакI амай районрани кьиле физвай мярекатра активвилелди иштиракзавай, рикIик гьамиша гьевесни къалабулух квай кас я, — къейдна Нариман Шамсудиновича.
Н.Абдулмуталибова генани давамарна: 2018-йисуз С.Саидгьасанован чалишмишвилерин нетижада райондин бажарагълу жегьилрин яратмишунар кIватIна, чапдай акъатна. И карда ада чIугур зегьмет тарифлуди я. Мукьвара Сулейман-Стальский районди къейддай 90 йисан юбилейдин мярекатар кьиле тухуникни Сажидин муаллимди еке пай кутазва”.
Мярекатдал генерал-полковник М.Танкаеван тIварунихъ галай фондунин регьбер Гь.Абдулжелилова, вич шаирдихъ галаз таниш хьайи дуьшуьш рикIел хкуналди ва адан къилихдин кьетIенвал къейд авуналди, С.Саидгьасановаз “Дагъустандин халкьдин шаир” лагьай тIвар гун патал РФ-дин Президент В.Путиназ, Дагъустандин Кьил В.Васильеваз ва талукь маса ксарин тIварарихъ чарар рекье тунин теклиф гана. КIватI хьанвайбуру и теклифдин тереф хвена.
Фестивалдин сергьятра аваз, и мярекатдал лезги авторрикай мад садан — шаир, литературадин критик Азиз Мирзебегован урус чIалал акъатнавай “ЧIехи шаир ва просветитель” ктабдихъ галазни танишарна. Адан цIийивиликай ва лайихлувилерикай чпин келимаяр Дагъустандин халкьдин шаир, ктабдин редактор Арбен Къардаша, “Лезги газетда” (гъилевай йисан 37-нумра) ктабдиз гегьенш рецензия гайи шаир ва публицист, литературадин отделдин редактор Мердали Жалилова лагьана. Кьилди къачуртIа, М.Жалилова Азиз Мирзебегова Алкьвадар Гьасанан ирс ахтармишунин карда — “Алкьвадароведенида” — къачунвайди лап лайихлу ва лап герек кам тирди къейдна.
Выставка-ярмаркадин мярекатар 21-сентябрдиз акьалтIна.
Рагнеда Рамалданова
