“Здравоохранение” милли проект кьилиз акъудун патал Дагъустан Республикадив 2024-йисалди 20 миллиард манатдилай виниз пулдин такьатар агакьда. Идан гьакъиндай республикадин здравоохраненидин министр Жамалудин Гьажиибрагьимова хабар гана.
“Здравоохранение” милли проектдик акатзавай регионрин 7 проект кьилиз акъудун патал Дагъустандиз вад йисан муддатда 20 миллиард манатдилай виниз такьатар чара ийида. 2019-йисуз чара ийидай пулдин кьадар, санлай къачурла, 3,4 миллиард манатдив агакьда. И пулунин асул пай здравоохраненидин идараяр медицинадин алай аямдин тадаракралди таъминарун патал серфда”, — лагьана Ж.Гьажиибрагьимова.
Адан гафаралди, алай вахтуналди дамаррин азаррин сифтегьан кьве отделенидиз сагъламвал гуьнгуьна хтун патал герек тадаракар къачуниз талукь икьрарар кутIуннава. Амукьай пулдихъ Къизляр шегьердин больница ва Махачкъала шегьердин клинический больница патал тадаракар маса къачун пландик ква. “Региондин “РикIинни дамаррин азаррихъ галаз женг чIугун” тIвар ганвай проект кьилиз акъудунин сергьятра аваз Дагъустанда дамаррин азаррин сифтегьан дережадин вад отделение ва региондин дамаррин азаррин кьве центр алава яз тадаракралди таъминарун фикирдиз къачунва”, — баян гана Ж.Гьажиибрагьимова.
«Лезги газет»
