Кудай ва ягъламишдай материалар кура-кура маса гунилай республикадин сад авунвай бюджетдиз къвезвай налогрин пуларин кьадар артухаруниз талукь месэладай совещание кьиле фена.
Ана Дагъустан Республикадин Кьил Владимир Васильева ва АЗС-рин иесийри иштиракна. В.Васильеван гафаралди, республикада алай йисан 8 вацран вахтунда АЗС-ривай къачузвай налогрин кьадар 44 процентдин артух хьана.
Раиж авур делилрал асаслу яз, Дагъустанда автозаправкадин 723 станция регистрация авунва, абур вири налогрин учетда ава. 2019-йисан сифте кьилерилай абуру гайи налогрин ва страховой взносрин кьадар саки 177 миллион манатдив агакьна. Идалай гъейри, алай йисуз АЗС-рал зегьметдин икьраррин бинедаллаз кIвалахзавай ксарин кьадар 1672-дав агакьдайвал артух хьана.
Дагъустандин Кьили рикIел хкайвал, АЗС-рин иесийри кудай ва ягъламишдай материалар кура-кура маса гунин месэлайрай махсус икьрардал къулар чIугуна, гьа икI, абуру чпин хивез са жерге мажбурнамаяр къачуна.
АЗС Fuel-1 сетдин векил Осман Къурбанова къейд авурвал, кьасухдай агъузарнавай къиметрикай менфят къачузвай АЗС-рихъ галаз женг чIугун герек я. Ада неинки Махачкъалада, гьакI республикадин маса шегьерра ва районра авай АЗС-рани дуьзгуьн къайда тун теклифна. “Къиметар кьасухдай агъузарунин рекьел элячIзавайбур “хъендик квай” карчияр я. Ида кудай ва ягъламишдай материалар кура-кура маса гузвай хиле авай гьалариз чIурукIа таъсирзава”, — лагьана О.Къурбанова.
«Лезги газет»
