Амри Рзаевич Шихсаидовахъ галаз зун 2007-йисуз таниш хьана. Яшариз зун адалай 17 йисан гъвечIи тиртIани, чи арада дуствилин алакъаяр тайин хьана. Са тIимил вахтарилай зун, адан хизандихъ — уьмуьрдин юлдаш Рея Сергеевнадихъ, рушар тир Ольга Амриевнадихъ ва Наталья Амриевнадихъ галазни таниш хьана.
Лап цIийи тарихда (2007-2014-йисар) сифте яз Амри Рзаевичаз 1693-1770-йисара яшамиш хьайи алим, сиясатчи, аскер ва жемиятдин деятель, Урададай тир Ибрагьим гьажидин ктабрин кIватIалдихъ галаз мукьувай таниш жедай мумкинвал гана. Адан ктабханада авай шейэр гъилелай авун патал чун алимдихъ галаз санал Шамильский райондин Урада хуьруьз са шумудра фенай. Араб чIалал гъилелди кхьенвай шейэрихъ галаз мукьуфдивди таниш хьайидалай гуьгъуьниз, 2014-йисуз А.Р.Шихсаидова “Араб чIалал гъилелди кхьенвай шейэрин каталог. Урададай тир Ибрагьим гьажидин коллекция» ктаб чапдай акъудна.
2015-йисуз Шамильский районда XVIII асирдин диндин ва жемиятдин деятель, Урададай тир Ибрагьим гьажидин уьмуьрдиз, кIвалахдиз талукьарнавай илимдинни тежрибадин конференция кьиле тухвана. Анал асул доклад Амри Рзаевича авуна. Гьа и конференциядал Урададай тир Ибрагьим гьажидин ктабханада авай шейэр чируник ва адан тIвар машгьур авуник еке пай кутунай Амри Рзаевичав “Шамильский райондин Гьуьрметлу гражданин” лагьай тIвар гунин гьакъиндай шагьадатнама вахкана.
Амри Рзаевич кIусни дамах гвачир, гзаф къени къилихрин инсан, жуьреба-жуьре рекьерай лап гегьенш, дерин чирвилер, пехилвал ийиз жедай хьтин хци кьатIунар авай кас тир. Гзаф крара за адалай чешне къачуна. Адан экуь къамат чи рикIера эбеди яз амукьда.
За Амри Рзаевичан багърийриз, вири мукьва-кьилийриз, дериндай хажалат чIугунивди, башсагълугъвал гузва.
Мегьамед Чеэров,
Шамильский райондин Урада хуьр
