4-сентябрдиз Мегьарамдхуьруьн райондин кьил Фарид Агьмедов РД-дин милли сиясатдин ва диндин крарин рекьяй министерстводин векилар тир Заур Уружевахъни Хасайбат Валиевадихъ галаз гуьруьшмиш хьана. Идакай «Лезги газетдиз» муниципалитетдин администрациядин пресс-къуллугъди хабар гана.

Гуьруьшда райондин кьилин сад лагьай заместитель Гьабибуллагь Мурадалиевани иштиракна. Гуьруьшдин вахтунда абуру мукьвара кьиле фидай «Мегьамед Ярагъви – Дагъустандин чIехи дамах» форумдиз гьазурвилер акунин месэлаяр веревирдна.

РикIел хкин, Мегьамед Ярагъвидиз талукь гегьенш форум 12-сентябрдиз кьиле тухудай фикир ава. Ам тешкилайбур РД-дин милли сиясатдин ва диндин крарин рекьяй министерство, «РД-дин Муфтият» ЦИРО, «Мегьарамдхуьруьн район» МР-дин администрация я.

Фарид Агьмедова форум вини дережада тешкилунин важиблувал къейдна. «Чи кьилин везифа – мярекат тешкиллувилин вини дережада аваз тухун патал шартIар арадал гъун я», — лагьана ада.

«Лезги газет»