И йикъара Сулейман-Стальский райондин Агъа СтIалрин хуьруьн ктабханадини культурадин центради санал, террориствилихъ галаз акси женг чIугунин карда рейсадвилин йикъан сергьятра аваз, «Зулум авачир алем» лишандик кваз, мярекат кьиле тухвана. И хабар «Лезги газетдив» райадминистрациядин пресс-къуллугъди агакьарна.

Мярекатдин макьсад хуьруьн жемиятдин фикир алай девирдин тIал алай, муракаб месэлайрал, кьилди къачуртIа, террориствални экстремиствал негьунал желбун, хатасузвал хуьнин серенжемар раижун хьана.

Мярекатдиз талукь яз «Ислам террордиз акси я!» махсус суьрет, жуьреба-жуьре газетрай, журналрай, ктабрай къачунвай, террориствилиз аксивалунин серенжемриз талукь материалар раижнавай «Террориствал – девирдин къурху» выставка гьазурнавай.

Мярекатда ктабханадин кIелчийри, полициядин участокдин уполномоченный Е.Ханова ва хуьруьн агьалийри иштиракна. Мярекат ктабханадин заведующий З.Закаржаевади ачухна ва кьилени тухвана. Ада алай девирда террориствили жемиятдиз гьихьтин къурху гузватIа, инсаниятдик и зулумди гьихьтин къалабулух кутазватIа, гьадакай  ихтилатна; инсафсузвилин гьерекатралди вагьшийри 2004-йисуз Бесланда арадал гъайи мусибатни инсанрин рикIелай садрани алат тийидайди лагьана.

Полициядин векилди вичин нубатда теракт арадал атай дуьшуьшра инсанри чеб гьикI тухун лазим ятIа, гьадакай ихтилатна. Мярекатдин сергьятра аваз иштиракчийри террористризни террориствилиз акси шиирарни кIелна.

«Лезги газет»