Ахцегь

2-сентябрдиз Чирвилерин йикъаз талукь шад мярекатар Кьиблепатан Дагъустандин районрин вири хуьрера кьиле фена. ИкI, Ахцегь райондин школайрикай сана — Ахцегьрин 1-нумрадин СОШ-да кьиле фейи шад мярекатда Дагъустандин Гьукуматдин Председателдин заместитель Рамазан Жафарова, Ахцегь райондин кьил Осман Абдулкеримова ва масабуру иштиракна.

Муаллимриз ва аялриз сувар тебрик авунихъ галаз сад хьиз, О.Абдулкеримова  гьар са касдин уьмуьрда муаллимвилин пешедихъ авай важиблувилел фикир желбна. Ада гьакIни Дагъустандин кьиле авай ксариз, кьилди къачуртIа, Владимир Васильеваз сагърай лагьана. Ада кьил кутуналди республикада “100 школа” ва “150 школа” проектрин сергьятра аваз райондин чирвилер гудай 7 идара ремонтнавайди къейдна.

Рамазан Жафарова кIватI хьанвайбуруз вичин патай ва Дагъустандин Кьил Владимир Васильеван тIварунихъай кIелунин цIийи йис тебрикзавай чими келимаяр лагьана. Ада чирвилер гудай идарада яратмишнавай шартIарилай гзафни-гзаф аслу тир образованидин еридиз къенин юкъуз кьетIен фикир гузвайди къейдна.

Школадин директор Сафинат Мамаевади, винидихъ тIва­рар кьунвай проектрин сергьятра аваз, вич кьиле авай мектебда хьанвай дегишвилерикай суьгьбетна.

Мугьманри школадин материально-технический базадиз къимет гана, спортзалдиз, предметрин кабинетриз тамашна, муаллимрихъ ва аялрихъ галаз суьгьбетарна.

Гуьгъуьнлай делегация, “150 школа” проектдин сергьятра аваз, мукьвара ремонтар акьалтIарнавай Калукрин СОШ-диз рекье гьатна.

Ахцегь районда мугьманвиле авай чIавуз Рамазан Жафаров просвещенидин “Luminary”  центрадиз ва Луткуна  эцигзавай школадизни фена.

Мегьарамдхуьруьн район

КIелунин  цIийи  йисаз  талукь  мярекатар  Мегьарамд­хуь­руьн райондин школайрани шадвилелди кьиле тухвана. ИкI, “150 школа” проектдин сергьятра аваз ремонтнавай ­Хъартас — Къазмайрин школада райондин кьил Фарид ­Агьмедова, адан сад лагьай заместитель Гьабибуллагь Мурадалиева, образованидин управленидин профсоюзрин тешкилатдин председатель Шевкет Мегьамедова, РУО — дин начальник Улубег Абейдуллаева, Хъартас-Къазмайрин хуьруьн кьил Омар Нагъиева, “Дорбостсервис” ООО-дин ге­неральный директор Леонард Нагъиева ва масабуру иш­тиракна.

Аялриз ва муаллимриз Чирвилерин югъ тебрикдайла, Фарид Агьмедова кIелунин цIийи йис башламишун вири халкьдин сувар хьиз кьиле тухузвайди, и югъ, яшарилай аслу тушиз, виридаз багьа тирди къейдна.

— Виридалайни гзаф гьевес ва рикIерик шадвилин гъалаба­ къе 1-классдиз кам къачузвай бицIекрик ква. И югъ куь ри­кIел уьмуьр­лух аламукьда, гьакI — школа ва ана кIелай йисар­ни. Абуру чи уьмуьрда экуь гел тазва. За квез сабурлувал ва тарсарал рикI хьун алхишзава. Школа акьалтIар­за­вайбур патал им кьетIен йис я. Куь вилик важиблу эк­заменар вахкун ва гележегдин пеше хкя­гъун­ акъвазнава. Къуй квехъ агалкьу­нар хьурай!

Заз къе муаллимрин коллективдизни сувар тебрик ийиз кIанзава.  Куьн неинки аялри чирвилер къачунин асул чешме, гьакI куьне абур тербияламишуниз, вири патарихъай ви­лик тухуниз ва чи чIехи уьлкве Россиядин граж­данар хьунин кардиз екез таъсирзава. Шадвилелди а кар мадни къейд ийиз кIанзава хьи,  Хъартас-Къазмайрин школа “150 школа” проект патал конкурсда гъалиб хьана. Дагъустандин Кьил Владимир Васильеван теклифдалди кьилиз акъудзавай и проектдин нетижада чаз ремонтдин кIвалахар кьиле тухудай ва школайрин материально-технический база хъсанардай  мумкинвал хьана, — лагьана райондин кьили.

Ф.Агьмедова районда образованидин ери хъсанаруниз кьетIен фикир гузвайди, и кар патал образованидин идарайра хъсан шартIар тешкилзавайди къейдна. Республикадин кьиле авай ксариз “150 школа” проектдин сергьятра аваз районда 3 школада ремонт кьиле тухудай ва материально-технический база хъсанардай мумкинвал хьунай чухсагъул малумарна. Райондин кьили и проектда иштиракай меценат, “Дорбостсервис” ООО-дин гендиректор Леонард Нагъиеван тIварцIихъни чими келимаяр лагьана.

Чпин нубатдай яз, Хъартас-Къазмайрин хуьруьн кьил Омар Нагъиев, меценат Леонард Нагъиевни рахана. Абуру райондин кьиле авай ксарилай, кьилди къачуртIа, Фарид Агьмедовалай чпин теклифрин ва проектрин тереф хуьнай, хуьруьз куьмекар гунилай разивал къалурна.

Гуьгъуьнлай шад мярекатдал Хъартас-Къазмайрин школадин директор, муаллимар ва аяларни рахана. Концертдин нумрайри ва 1-классдиз атанвай аялри школадикай кIелай  шиирри сувар мадни итижлуди авуна.

Кьурагь

Кьурагьрин 1 ва 2-нумрайрин умуми образованидин школайра  кIелунин цIийи 2019-2020-йисаз талукь шад мяре­катра РД-дин Хатасузвилин Советдин секретардин сад ­лагьай  заместитель   Сефербег  Гьамидовани  иштиракна. Ада вичин ва Дагъустандин Кьил Владимир Васильеван тIва­рунихъай муаллимриз ва аялриз Чирвилерин югъ теб­рикна.

Кьурагьрин 1-нумрадин школада мярекат муаллим Шафига Къазиевади кьиле тухвана. Сифте гаф ада школадин директор Гьамид  Мисриеваз гана.

— Акуна-такуна, гатун варцарни акъатна. Ингье виридан рикIерик шадвални къалабулух кутадай сувар — Чирвилерин югъ — алукьна. Гатун варцара школайра кIелзавай аялриз ял ядай, къуватар артухардай ва сифте яз школадиз физвайбурузни гьазурвилер аквадай мумкинвилер хьана. И йис куьн гьар сад патал итижлуди, цIийивилералди девлетлуди жеда. Йисан эхирдай бязибуруз шко­ладихъ галаз айрутмиш хьун, мадни еке чирвилерихъ ялун кьисмет  жеда. Заз квехъ чирвилер къачунин ашкъи ва и рекье четинвилериз дурум гудай сабурлувал артух хьана кIанзава. Къуй куь далудихъ четин вахтунда куьмекдай, куь тереф хуьдай багърияр гьамиша галаз хьурай! Къенин югъ школада кIел­завай гьар са аялдин уьмуьрда рикIик шадвилин гъалабани секинсузвал кутадайди я. КIелунин цIийи йис алукьун — им неинки чирвилерив эгечIун, гьакI санал кIелзавай, сад-садаз куьмек гуз гьазур тир аялрихъ ва чпин пешекарвални сабурлувал кIелунрин бегьерлувилин замин тир муаллимрихъ галаз гуьруьшмиш хьунни я. За, школадин директор яз, куьн патал и йис итижлуди ва рикIел аламукьдайди жедайдахъ инанмишвилин гаф гузва. Муаллимрихъ галаз санал цIийи чирвилер къачунин кар регьятди, гьа са вахтунда мадни бегьерлуди хьун патал зегьмет чIугвада, — алава хъувуна ада.

Шад мярекатдал Кьурагь райондин хуьрерин кьилерихъ галаз кIвалахунин рекьяй тамам ихтиярар ганвай Эльмира Исаева, школадин директордин заместитель Валентина Эмиргьамзаева ва масабур рахана, Чирвилерин югъ теб­рикна.

Гуьгъуьнлай кIелунра, спортда ва школадин общественный уьмуьрда тафаватлу хьайи аялрив райондин кьиле авай ксарин ва образованидин отделдин тIварунихъай грамотаяр, дипломар, тарифдин чарар ва къиметлу пишкешар вахкана.

КIелунин цIийи йисуз сифте зенг яна. Аялри чпин классриз гьерекатна, партайрихъ чкаяр кьуна.

Хуш сефер хьурай квез, гьуьрметлубур!

Докъузпара

Докъузпара райондин вири школайрани и юкъуз, адет хьанвайвал, шад мярекатар кьиле тухвана. Гатун рухсатрин вахтунда ял янавай аялар, гъилера цуькверин кIунчIар аваз, школадин гьаятда Чирвилерин йикъаз талукьарнавай ­линейкадал кIватI хьанвай. Чпин муаллимрихъ ва санал кIелзавай рушарихъни гадайрихъ галаз гуьруьшмиш хьуни абурун гуьгьуьлар хкажнавай. 1-классдиз атанвай би­цIек­рин рикIерик иллаки шадвилин гъалаба квай. Алай йисуз Докъузпара районда школайрин партайрихъ 1900-далай гзаф  аялар ацукьна. Абурукай 190 аял 1-классдиз атанвайбур я.

Чирвилерин юкъуз “Докъузпара район” МР-дин кьилин везифаяр вахтуналди тамамарзавай Агьмед Агьмедов Усугъчайдин СОШ-диз мугьман хьана. Шад мярекатда РД-дин Кьилин ва Гьукуматдин Администрациядин патай векил, Да­гъустандин госзакупкайрин рекьяй Комитетдин председателдин везифаяр тамамарзавай Жафар Гьажибегова, райондин образованидин управленидин начальник Гъвейибег Шагьвеледова, УСХ-дин начальник Аким Гьажиева, ИМЦ-дин ди­ректордин заместитель Пирагьмед Рамазанова, аялрин диде-бубайри ва масабуру иштиракна.

КIватI хьанвайбуруз сувар школадин директор Тажидин Аразова, гьакI А.Агьмедова, Ж.Гьажибегова, Гъ.Шагьвеледова ва масабуруни тебрикна. Абуру алай аямда чирвилерихъ авай важиблувал ва тежрибада абур ишлемишун, и барадай школади къугъвазвай важиблу роль къейдна.

— Гьуьрметлу дустар! За квез рикIин сидкьидай Чирвилерин югъ мубаракзава. Чаз и сувар гзаф важиблу я ва кIанда, гьикI хьи, школада кIелзавай йисар чи гьар садан гележегдин бине эцигзавай, чахъ чи рикI алай муаллимарни дустар жезвай йисар я. Школада кIелдайла, арадал атай дуствал виридалайни мягькемди я гьавайда лугьузвач. Им гьакъикъат  я. Школада чна дибдин асул чирвилер къачузва. Абурулай уьмуьрда къазанмишдай алакьунар, са гафуналди, чи гележег аслу жезва, — къейдна А.Агьмедова.

Шад мярекат, адетдиз элкъвенвайвал, 1 ва 11-классра кIелзавай аялри зенг ягъуналди акьалтIна.

Чин гьазурайди – Рагнеда Рамалданова