«Зун Мислимат, гьахъвал кIани инсан я,
Гьуьрметлувал къизилдилай масан я…»
«Лезги я зун – Шарвилидин неве я,
Куьредин руш, элдин къадим хуьревай…».
«Шаир кIанда, дуьнья амаз рекьин тийир, чан алай!
Шаир кIанда, цав хьиз рахаз, чуьнгуьрдал хьиз ван алай!…».
Вичин къелемдикай рикIин къеняй атай ихьтин келимаяр хкатай СтIал Мислиматан (Мислимат Агьмедпашаевадин) тIвар кIелзавайбуруз фадлай ва хъсандиз таниш я. Адан «Дуьнья я ман» (2005-йис), «КIела, азиз балаяр!» (2008-йис), «Зи дуьнья» (2014-йис) шииррин ктабар чапдай акъатна.
Яшар 93 йисалай алатнавай, гьеле школада кIелзавай йисарилай шиирар теснифзавай, тIебиатди вичиз яратмишунрин кьетIен пай ганвай камаллу и дишегьлидихъ ктабар мадни гзаф жедай, эгер ада ктаб акъудун патал Дагъустандин писателрин Союздиз вугай шииррин чIехи пай «квахьначиртIа» ва са ктаб патал гьазурай шиирар 1993-йисуз кIвалера цIай кьуникди каначиртIа («Гьайиф зи шиирар!» гьарай акъатналдай СтIал Мислиматай кIвалер кудайла).
Ингье, мукьвара СтIал Мислиматан «Шиирар» ктабдиз экуь дуьнья акуна. Са бязи авторри акъудзавай «ктабриз» килигайтIа, «Шаиррин дидедин» ктабдиз роман, том лугьуз жеда. И гафар тестикьарун яз за са шумуд рекъем гъида: «Шиирар» ктаб шартIунин 30 печатдин чарчикай, 520 чиникай ибарат я. Ктабда 570-дав агакьна шиирар, «Саид ва зулумкар Сурхай» поэма, Етим Эминан «Къавум» шиирдин бинедаллаз кхьенвай сегьне, СтIал Мислимата лезги чIалаз таржума авунвай Генжеви Низамидин «Нуширван ва Байкъушрин суьгьбет» эсер гьатнава.
Ктабда гьатнавай эсерар «Зи дуьнья», «Фагьум ая!», «Ажеб жедай, хъел къведачиртIа», «Яраб мад вуч хъижедатIа?», «Куьз фагьумзавач?», «Зи фикирар», «Муьгьуьббат я и дуьньядин гуьзелвал», «Гьардахъ вичин тIал ава», «Мад дили марф къун тавурай дуьньяда», «ТIебиат, вун гьикьван гуьзел я?!», «ЧIални Ватан шуьрбетдилай ширин я», «Яратмишдай чирагъ гвайбур, квевни кьве гаф рахан гила», «Бахш-шиирар» кьилерик кваз ганва.
Заз акурвал, СтIал Мислиматан шиирра философия, несигьатар, везинлувал, кьетIен гекъигунар гзаф ава. Вири абур анжах кьетIен алакьунар, устадвал авай шаирдиз – чIалан устаддиз хас я.
Зун СтIал Мислиматан яратмишунрихъ галаз фадлай ва хъсандиз таниш я, ктаб кIелайла зун мад сеферда инанмиш хъхьана хьи, СтIал Мислиматакай рахадайла Инсан, Диде, Шаир, Несигьатчи… гафар чIехи гьарфарилай кхьин лазим я.
«ЦIийи Къавкъаз» издательский дестеди акъуднавай «Шиирар» ктабда СтIал Мислиматакай журналистар тир Гьажи Ильясова, Тамила Ильясовади ва Мегьамед Ибрагьимова кхьенвай «Шаирдин ва гамарин устаддин уьмуьр ва яратмишунар» очерк, гьакIни кIвалин альбомдай къачунвай хейлин шикилар гьатнава.
СтIал Мислимата «Вуч тан за?» шиирда кIелзавайдахъ элкъвена суал гузва: «Вуч тан за алемдиз жуван гъилелай?»».
Вичин и суалдиз яшлу дишегьлиди – шаирди «Захъ дердияр амазма…» шиирда жавабни гузва: «…Фад я гьеле фин чилелай! Захъ дердияр ацIанма хьи….
Хазран Кьасумов
