РД-дин Кьил Рамазан Абдулатипован 2017-йисан 22-сентябрдиз кьабулнавай 244-нумрадин Указдал асаслу яз, зегьметдин рекье агалкьунар къалурунай ва хейлин йисара бегьерлудаказ кIвалахунай чи ватанэгьли, ери-бине Докъузпара райондин Къурушрин хуьряй тир Гьасен Агьмедханович Балатоваз «Дагъустан Республикадин вилик лайихлувилерай» орден ганва.

Къейд ийин хьи, республикадин общественный ва государственный машгьур деятель Гьасен Балатов Дагъустанда чкадин самоуправление арадал атунин бинейрив хьайи, адан къанун-къайдадин, нормативно-правовой база тешкилуник кьетIен пай кутур ксарикай сад я.

Алай йисуз гьуьрметлу агъсакъалди вичин 80 йисан юбилейни къейднава.

«Лезги газетдин» редакциядин коллективди Гьасен Агьмедхановичаз чIехи шабагь тебрикзава ва адахъ чандин сагъвални яргъи уьмуьр хьун алхишзава.