Алатай киш юкъуз Махачкъалада мини-футболдай республикадин “Тумаждин туп” тIвар алай 22-турнир ачухуниз талукь шад мярекат кьиле фена. Ана Дагъустандин Халкьдин Собранидин спикер Хизри Шихсаидова, Госдумадин депутат Гьажимет Сафаралиева, РД-дин образованидин ва илимдин министрдин заместитель Тагьир Кудаева, шегьердин спорткомитетдин председатель Марат Ибрагьимова, РД-дин образованидин ва илимдин министерстводин РДЮСШ-дин директор, Россиядин лайихлу тренер Александр Маркарова, Кеферпатан Кавказда Олимпиададин сад лагьай чемпион Загалав Абдулбегова, гьакIни республикадин машгьур спортсменри ва футболдал рикI алай ксари иштиракна. Хъсан адетдиз элкъвенвай спортдин и серенжемда иштиракун патал арзаяр ганвайбурун арада неинки са меркездай, гьакI республикадин амай шегьеррай ва жуьреба-жуьре районрай тир гъвечIи футболистарни ава. Турнирдин гъалибчияр яшариз килигна 6 категориядай тайинарда.
— Играми балаяр, гьуьрметлу диде-бубаяр! Къе Дагъустанда футболдин еке сувар ава. Гзаф йисар идалай вилик сифте сефер яз “Тумаждин туп” тIвар алаз турнир машгьур футболист Лев Яшина тешкилнай. Ам Дагъустанда кьиле тухун теклифай Александр Маркароваз чна, республикадин кьиле авай ксари, аялри ва абурун диде-бубайри Дагъларин уьлкведа футбол вилик тухуник еке пай кутунай сагърай луьгьузва. Ихьтин ксарин жергедай тир Загалав Абдулбегован тIварцIихъни чна рикIин сидкьидай тир чими келимаяр лугьузва, — ихьтин гафарилай ачухна спортдин мярекат Хизри Шихсаидова.
Турнир ачухуниз талукьарнавай шад мярекатдал рахай амай ксарини адан важиблувал, кьетIенвал къейдна. Кьуьлердайбурун “Махачкъала” ва “Салам” ансамблри кIватI хьанвайбурун гуьгьуьлар мадни шадарна.
Турнир ачухдалди са шумуд югъ вилик Дагъустандин физический культурадин ва спортдин министерствода кьиле фейи пресс-конференциядал шегьердин спорткомитетдин председатель Марат Ибрагьимова къейд авурвал, “Тумаждин туп” турнир Кеферпатан Кавказдин федеральный округда кьиле тухузвай спортдин виридалайни чIехи акъажунар я. Россияда лагьайтIа, и турнир алай йисуз 55-сеферда кьиле тухуда.
Пресс-конференциядал рахай (ана гьакIни Махачкъаладин футболдин федерациядин президент Жамал Генжеханова, мини-футболдин федерациядин президент Омар Зиятханова ва масабуруни иштиракна) РД-дин образованидин ва илимдин министерстводин РДЮСШ-дин директор, Россиядин лайихлу тренер Александр Маркарован гафарай чир хьайивал, 55 йис идалай вилик кьиле тухвай сад лагьай турнирда адазни иштиракдай мумкинвал хьанай. Гуьгъуьнлай, и турнир чи республикада кьиле тухудайла, ана иштиракайбурун арада Дагъустандин машгьур футболист, алай вахтунда футболдин “Легион Динамо” клубдин президент Шамил Лахияловни авай. Пресс-конференциядал ада къейд авурвал, “Тумаждин туп” турнир гележегда машгьур футболистар хьун патал аялри ва жаванри чпикай хабар гудай, чпин алакьунар ва устадвал къалурдай хъсан майдан я.
— Аял чIавуз зани и турнирда иштиракнай. Ам за гьамиша вилив хуьзвай, зи рикI алай спортдин мярекат тир. Чаз инаг жуван алакьунар къалурдай хъсан чка тирдакай хабар авай. ГьакI хьунни авуна. Къенин юкъуз машгьур гзаф спортсменри футболиствилин чпин рехъ гьа и турнирдилай башламишна. Гзафбур патал и турнир «трамплиндиз» элкъвена. Гьавиляй за аялриз, компьютерар ва телефонар кьулухъна, и турнирда иштиракуниз ва устадвал къалуруниз, чпин диде-бубаяр ва футболдал рикI алай вири ксар шадаруниз эвер гузва. Инанмиш я, ихьтин серенжемра иштиракуни квек руьгь кутада, квез футбол кIанарда, куь гележегни куьне спортдихъ галаз алакъалу ийида,-алава хъувуна ада. И гафариз къуват яз, “Тумаждин туп” турнир себеб яз, чпин уьмуьр футболдихъ галаз алакъалу авур ва машгьур хьайи футболистрин мисаларни гъана.
Рагнеда Рамалданова
