Мукьвал йикъара Сулейман-Стальский райондин Агъа СтIалрин хуьре, рагьметлу Ажадулагь Жарулаев рикIел хуьнин лишан яз, футболдай 19-сеферда районрин уртах турнир кьиле фена. Ам тешкилайди ва кьиле тухвайди райондин физический культурадин, спортдин, туризмдин ва жегьилрин крарин рекьяй Комитет (директор — Надир Эфендиев) я.
Турнирда Кьиблепатан Дагъустандин районрай тир 16 командади иштиракна. Абурун арада 15 юкъуз къизгъин акъажунар кьиле фена.
Нетижада 1-чка “Агъа СтIал 2” командади кьуна. 2, 3 ва 4-чкайриз, талукь тирвал, “Агъа СтIалрин ветеранар”, “Кьасумхуьр” ва “Сабнова” командаяр лайихлу хьана.
КIвенкIвечи чкаяр кьур командайриз кубокар, медалар ва пулдин пишкешар гана.
Махсус призриз турнирда тафаватлу хьайи кьилдин футболистарни лайихлу хьана.
Н.Эфендиева чаз лагьайвал, А.Жарулаеван турнирда иштиракзавай командайрин кьадар йисандавай-суз артух жезва. Гьавиляй гележегда ам республикадин дережадин турнир яз кьиле тухунин ният ава.
Хазран Кьасумов
