Алатай кIелунин йисуз Кьурагь райондин кьве школа — Ашарин ва Хуьрехуьруьн юкьван школаяр — республикадин Кьили теклифнавай  “100 школа” проектдай капитальнидаказ ремонт авуна. Алай йисуз и проект “150 школа” тIвар алаз кардик акатнава. Адал асаслу яз чи райондин 8 школа капитальнидаказ ремонтдайвал я.

И йикъара райондин Информационный технологийрин  ва печатдин центрадин пеше­карар, и проектдай ремонтрин кIвалахар гьикI кьиле тухузватIа чириз, КIутIулрин, Штул­рин, Кье­пIиррин, КIирийрин юкьван школайриз фена.

Штулрин юкьван  школадиз чун фейила, рабочияр къавуз ракь ягъиз кардик квай. Школа­ 1966-йисуз эцигнавай куьгьне дараматда ава. Ина 50 аялди чирвилер къачузва. Школадиз капитальный ремонт чарасуз тирди аквазва. Анин полар, дакIарар, ракIарар куьгьне хьанва.­

УстIаррин бригададин бригадир Фазил Фазилова ва школадин директор Сабир Эфендиева къейд авурвал, инал кIвалах кьиле тухузвайди “Альянс” ООО я. Школадин къав ми­хьиз дегишарда. Полар ва дакIарарни дегишарда лагьанвай, амма  пулдин такьатар бес жезвач. Гъиле авай кIвалахар куьтягьайла, школада куьлуь-шуьлуь ремонтар муаллимрин коллективди ва техперсоналди ийида.

КIутIулрин школадин дарамат алай чкадал агакьайла, чун идарадин гьаятда анин директор Наида Мурадалиевади кьабулна. КIутIулрин школада “Альянс” ООО-ди капитальный хейлин кIвалахар кьиле тухузва. Анин къав, дакIа­рар, полар, ракIарар, электропроводка дегишарда, цIуз акси цин гьамбархана эцигда, школадин вилик патан ре­кьер туькIуьр­да, чими туалет эцигда.

“И винидихъ лагьанвай кIвалахар авуртIа, чи школа михьиз цIийи хъжеда. Школадин да­рамат 1930-йисара эцигнавайди я, амма а вахтунилай дакIарар садрани дегишарнавач, хъуьтIуьз къай къвез, четин жезвай. Идалайни гъейри, райондин кьил Замир Азизова чи школадиз цIийи мебелни ахъайнава, имни, гьелбетда, еке къулайвал я. Школа проектдик кутунай Республикадин Кьил В.Василье­ваз ва райондин кьил З.Азизоваз чухсагъул”­, — лагьана Н.Мурадалиевади.

КIирийрин юкьван школадин директор Фарман Шихкеримован суьгьбетдай чаз малум хьайивал,  инал кIвалахар “Элитстрой­группа” ООО-ди ийизва. Республикадин “150 школа” проектдай кутунвай пулдин такьатрихъ къазанхана эцигзава, пичер дегишарзава, алай аямдин истемишунрихъ галаз кьадайвал ийизва, школадин гьаятдиз фи­дай рекье плита твада, чими туалетар эцигда, цIуз акси гурар кутада, дараматдик кьвед лагьай ракIар кутада. Ремонтрин хейлин кIва­лахар авунвайди чун аниз гьахьайла, виле акьазвай. Виринра михьивал авай, цIийиз янавай ширери нур гузвай.

И юкъуз чун КьепIиррин юкьван школада­ни хьана. Чун фейила, школадин директор Ариф Жабраилов чкадал алай. Ана ремонтрин кIвалахар кьиле физвай. Школадин коллективдини и кардик алакьдай пай кутазвай.

“Чи школада “150” школа” проектдай кIва­лах “Прогресс” ООО-ди кьиле тухуда. Школа­дин са пай кабинетрин полар дегишарда. Агакь тавуртIа, кьве сменада тарсар тухун мумкин я. Гьавиляй чна са пата куьлуь-шуьлуь ремон­тарни ийида, алай кIелунин йисуз школада 150 аялди кIелда”, — къейдна А.Жабраилова.

Алван Рамазанова