Гад эхирдал къвез са акьван вахт амачтIани, чи республикадин гзаф чкайра, гьа жергедай яз къадим Дербентда ва анин этрефайрани туриствилин сезон гьеле худда ама. Турбазайра уьлкведин гзаф чкайрай ял ягъун ва Дагъларин вилаятдин лишанлу чкаяр, тIебиатдин гуьрчегвал акун патал къвезвай туристрин кьадар артух жезва.
Мугьманар кьабулуниз вахтунда гьазурвилер акун себеб яз Дербентда авай “Чайка”, “Дербент” ва шегьердивай са акьван яргъа авачир “Къизилдин къумар” (“Золотые пески”) турбазайрилай, анрин коллективрилай ял язавайбур рази я.
— Чи турбаза кардик кваз гзаф йисар я, — суьгьбетзава “Чайкадин” директор Мегьамед Алиевич Гагаева. — И девирда чина са шумуд агъзур кас туристри ял янава ва чпин сагъламвал мягькемарнава. ЦIинин сезонни писди хьанвач. Ам башламишайдалай инихъ (гьелелиг) 300 касдилайни виниз туристар кьабулнава ва и кIвалах давамарзава. ГьикI хьи, гьавадин хъсан шартIар авай Дербентдин зонада туриствилин сезон сентябрдин юкьваралди давам жезва.
Турбазадин столовойда ва кафеда, ял язавайбурун тIалабунарни тамамаруналди, жуьреба-жуьре хуьрекар гьазурзава. Туристриз Дагъустандин халкьарин хуьрекар иллаки гзаф бегенмиш я, — давамарзава вичин ихтилат Мегьамед Алиевича.
Гьуьлуьз лап мукьвал алай и турбазадин пляжни тарифуниз лайихлу я. Анин къум гьамиша михьиз хуьзва, лепейри гъизвай гьуьлуьн набататар кIватI хъийиз, пляждилай къерехдиз акъудзава.
“Чайка” турбазада ял язавайбур спортдални машгъул хьун патал вири шартIар яратмишнава: шахматрин, тIамайрин ва теннисдин залар, волейболдин майдан кардик ква.
Туристар патал ял ягъун гзаф терефринди хьунни фикирда кьунва. Мугьманриз къадим Дербентдин музейриз, “Нарын-къеле” къеледиз, Хучнидин чарчардал ва маса гуьрчег чкайриз махсус автобусра аваз сиягьатар тешкилзава.
“Чайка” турбазадикай, къадим Дербентдикай фикирар чирун патал зун са жерге мугьманрихъ галазни рахана. И барадай ингье анжах са мисал:
— Зун зи уьмуьрдин юлдаш ва кьве хтулни галаз ял ягъиз Дербентдиз Дальний Востокдай атанвайди я, — лугьузва яшлу дишегьли Валентина Ивановна Александровади. — Шегьердиз атайла, чкадин гидди чаз “Чайка” турбазада ял ягъун меслят къалурна. И меслятдал амал авуналди чун гъалатI хьайи кар авач, гзаф сагърай коллектив. Эгер кьисмет хьайитIа, къведай йисузни гьа иниз атун фикирда кьунва за ва зи уьмуьрдин юлдашди. Таниш-билишризни теклифда.
Турбазада хьайи юкъуз заз иниз къерехдин инсанарни къвез акуна.
— Чи шегьерэгьлияр я, Нариман муаллим. Чна гьабурузни турбазадин пляждал къведай, вахтуналди чина ял ядай (пулсуздаказ) ихтияр гузва, мергьяматлувал хъсан затI я, — жаваб гана зи суалдиз Мегьамед Гагаева.
“Чайкадин” директорди генани малумарайвал, туриствилин и карханади шегьердин бюджетдиз вахт-вахтунда налогар гузва, мергьяматлувилин мярекатра иштиракзава.
Нариман Къарибов
