Сулейман-Стальский райондин кьил Нариман Абдулмуталибов экономикадин илимрин доктор, профессор, Россиядин АПК-дин Гьуьрметлу работник Шарип Шариповахъ ва географиядин илимрин доктор, профессор Шагьмардан Мудуевахъ галаз гуьруьшмиш хьана. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана. Гуьруьш кьиле фидай чIавуз райондин хуьруьн майишат вилик тухунин, агропромышленный сектордиз инвестицияр желб авунин, чил менфятлудаказ ишлемишунин, интенсивный жуьредин багъманчивал вилик тухунин, марф къурдай жуьреда яд гунин къайда кардик кутунин месэлаяр веревирдна.
Дагъустандин государстводин халкьдин майишатдин университетдин профессорар тир Шарип Шарипова ва Шагьмардан Мудуева аграрный секторда алай аямдин илимдин ачухунар, цIийи жуьрейрин технологияр кардик кутун теклифна. “Сулейман-Стальский райондихъ багъманчивал, уьзуьмчивал, гьакIни малдарвал вилик тухун патал тIебиатдинни гьавадин хъсан шартIар ава, абурукай менфят къачуна кIанда. Алай аямдин илимдин агалкьунар кардик кутуртIа, нетижаяр аквадайвал хкаж жеда. И барадай чна санал кIвалахун герек я”, — къейдна алимри.
Райондин кьил Нариман Абдулмуталибова алимрин теклифрин тереф хвена ва аграрный производство вилик тухун патал абурухъ авай важиблувал къейдна. Муниципалитетдин кьили Шарип Шариповаз ва Шагьмардан Мудуеваз райондиз атунай сагърай лагьана ва санал кIвалахуник умудар кутазвайди къалурна.
«Лезги газет»
