2019-йисан эвелдилай республикадин хуьруьн майишатдин хилен зегьметчийри, санлай къачурла, 115 миллион манатдин къимет авай хуьруьн майишатдин цIийи 100 уьлчме техника маса къачуна, хабар гузва РД-дин хуьруьн майишатдин ва недай суьрсетдин министерстводин пресс-къуллугъди. Алай йисан эхирдалди республикади, санлай къачурла, 400 миллион манатдин кьадарда аваз хуьруьн майишатдин техника маса къачун планламишнава — алатай йисан кьадардилай 35 процентдин гзаф.
И кар патал республикадин дережада финансрин патай куьмек гунин ва хуьруьн майишатдин хиле зегьмет чIугвазвай ксарин муьштеривилин мумкинвилер артухарунихъ элкъуьрнавай алава серенжемар кьабулзава. Кьилди къачуртIа, республикадин бюджетда 2019-йисуз региондин лизинг патал 100 миллион манат ва техникадиз субсидияр гун патал 25 миллион манат чара авун фикирда кьунва. Дагъустандин хуьруьн майишатдин суьрсет гьасилзавайбур патал и кьве чешме техникадин парк цIийи хъувунин карда асулбур я.
Региондин АПК-дин карханаяр лазим тир хуьруьн майишатдин техникадалди таъминарунин месэла и йикъара хуьруьн майишатдин федеральный министрдин сад лагьай заместитель Жамбулат Хатуовахъ галаз кьиле фейи селекторный совещанидал веревирднай.
Дагъустандин патай совещанида республикадин хуьруьн майишатдин ва недай суьрсетдин цIийиз тайинарнавай министр Абзагьир Гьуьсейнова, “Дагагроснаб” АО-дин гендиректор Чамсутин Мутуева, министерстводин са жерге отделрин начальникри иштиракна.
«Лезги газет»
