Яшайишдин кIвалериз талукь Domofond.ru порталдин пешекарри уьлкведин чIехи 63 шегьердин цIийиз эцигнавай гзаф мертебайрин кIвалера квартирайрин къиметар 2016-2019-йисара гьикI дегиш хьанатIа ахтармишна.
Нетижайри къалурайвал, эхиримжи 3 йисан вахтунда цIийи кIвалера авай квартирайрин къиметар 45 шегьерда — багьа, 18 шегьерда ужуз хьанва. Виридалайни гзаф — 53,4 процентдин — кIвалер Сочи шегьерда багьа хьанва, ина са “квадратдин” къимет йисалай-суз виниз акъатзава.
Дагъустандин меркезда гзаф мертебайрин дараматра авай цIийи кIвалерин къиметар 13,1 процентдин агъуз хьанва — им ахтармишнавай амай шегьеррив гекъигайла, къиметар виридалайни гзаф агъуз хьанвай чка я.
Алай вахтунда цIийи квартирайрин са квадратный метр, юкьван гьисабдалди, 36,5 агъзур манатдай маса гузва. Гьа са вахтунда 2016-йисан июлдиз адан къимет 42 агъзур манатдиз барабар тир.
Инал къейд ийин, эцигунрин хилен пешекарри республикада яшайишдин кIвалерин къиметар алукьзавай йисара къвердавай виниз фидайдакай лугьузва. И кар эцигунрин хиле къуватда гьатнавай цIийи къайдайрихъ — эскроу-счетар кардик кутунихъ галаз алакъалу ийизва. Гьелелиг кIвалерин къиметар садлагьана хкаж хьанвачтIани — 1-июлдалди гъиле кьунвай проектар цIийи закондик акатзавач эхир. Амма эцигунрин базарда муьштерийриз теклифиз жедай цIийи кIвалерин кьадар къвердавай тIимил, авай кIвалерин къиметар лагьайтIа, виниз жеда.
«Лезги газет»
