2017-йисан 9-сентябрдиз Дагъустан Республикада ра­кьун рекьин 901-км-да сигнализацияди идара ийизвай, амма дежурный къуллугъчиди гуьзчивал тухун тийизвай переезддал авария арадал атана.

 1991-йисуз дидедиз хьанвай Р.С.Бекмамметова ракьун рекьин переезддилай элячIдай къайдайрин 15-пункт чIурун себеб яз, адан автомашин пассажирар тухузвай 346-нумрадин “Адлер-Нижневартовск” поезддин 7-вагонда акьуна. Аварияда 15 пассажирдал, гьа гьисабдай яз 3 аялдал ва поезддин бригададай тир 2 къуллугъчидални хирер-кьацIар хьана. Автомашиндин шофер реанимациядиз агакьарна.

Кеферпатан Кавказдин ра­кьун рекьин руководстводик Да­гъустан Республикада ракьун рекьин переездрал хатасузвал таъминарунин барадай гьалар чIур хьуни еке къалабулух кутун­ва. ИкI, 2017-йисан алатнавай варцара Кеферпатан Кавказдин ракьун рекьерин переездрал хьанвай ДТП-рин 27 дуьшуьшдикай 8 (2016-йисав гекъигайла кьве сеферда артух хьанва) чи республикадиз талукьбур я. Абурун нетижада 3 кас телеф, 5 касдални залан хирер-кьацIар, пассажирар тухузвай ва парар дашмишзавай поездар энгел хьана.

Автомашинар пассажирар тухузвай поездра акьуни иллаки къалабулух кутазва, гьикI хьи и вахтунда поездра аваз физвай инсанрин ва локомотивдин бригадайрин сагъламвал еке хаталувилик акатзава.

Къейд авун лазим я хьи, ракьун­ ре­­кьин переездрал жезвай вири ава­рияр автомашинрин шоферри РФ-да­ ре­­кье­ра гьерекат авунин къайдайрал амал тавунин не­тижада арадал къвез­ва.

Водителар, рикIел хуьх!

Ракьун рекьерин переездар лап хаталу, дикъет гана кIанза­вай чкаяр я. Мукъаят хьун ва пе­реезддилай элячIдай вахтунда рекьера гьерекат авунин къайдайрал амал авун чарасуз я. Абур чIурун себеб яз куьне неинки куь машин кукIвар хьунал гъизва, гьакIни куь ва поездда авай ксарин уьмуьрни хаталувилик кутазва.

Гьуьрметлу водителар!

Куьне куьн ва куь машинда авай, гьакIни поездда авай ­пассажиррин уьмуьр ва сагъламвал хаталувилик кутамир. Сад-кьве декьикьа вахт кьенят ийиз ала­хъуналди куьне вишералди инсанар бахтсуз авун мумкин я. Куь хатасузвал куь гъиле ава.

Сергей Магадов,
Махачкъаладин региондин инфраструктурадин Дирекциядин начальник