Алай йисан 18-сентябрдиз чавай cоветрин ва россиядин машгьур алим-математик, Россиядин илимрин академиядин “Математика” журналдин секретарь, редактор яз кIвалахай, физикадинни математикадин илимрин доктор Керимов Мавлуд Керимович гьамишалугъ яз къакъатна.
М.К.Керимов 1925-йисуз гилан Сулейман-Стальский райондин Агъа СтIалрин хуьре дидедиз хьана. Девир четинди тиртIани, ада юкьван школадин 8-класс агалкьунралди акьалтIарна.
1939-йисуз М.Керимов Кабардино-Балкариядин педагогвилин институтдин физикадинни математикадин факультетдик экечIна. А чIавуз 1-курсунин студентдин анжах 14 йис тир. Са тIимил вахтарилай немсерин фашистри чал дяве илитIна. Миллионралди советрин ватандашрин хьиз, пединститутдин студентдин ислягь уьмуьрдани еке дегишвилер гьатна.
М.Керимова, чирвилер къачунивай къерех тахьана, душмандин хура акъвазун патал далу патан кIвалахра иштиракна, дяведин девир патал туькIуьрнавай фад-фад чирвилер гудай программадай 1942-йисуз пешекарвал къачуна. Ам Советрин уьлкве душмандикай хуьнин пак кардивай къерех хьанач, Яру Армиядин жергейриз гуьгьуьллудаказ гьахьна. Жергедин аскер Мавлуд Керимова вичин къуллугъдин везифаяр Азербайжан ССР-да кьилиз акъудна.
1946-йисуз Азербайжандин государстводин университетдин физикадинни-математикадин факультет акьалтIарай Мавлуд Керимов са йисалай уьлкведин меркезда СССР-дин АН-дин Стеклован тIварунихъ галай математический институтдин аспирантурадиз (“Геометрия” пешедай) гьахьна. 1951-йисуз ада геометриядихъ галаз алакъалу месэлайрай СССР-дин АН-дин Математикадин институтдин ученый советдал кандидатвилин диссертация хвена. Бегьерлудаказ илимдин месэлайрал машгъул хьайи йисара ада математикадин жуьреба-жуьре хилерай 100-далай виниз кIвалахар чапдай акъудна.
М.Керимов 1952-йисуз СССР-дин АН-дин Илимдин информациядин институт тешкилай ксарикай садни я.
1960-йисуз Мавлуд Керимович СССР-дин АН-дин Вычислительный центрада кIвалахал акъвазна. Ина адакай илимдин чIехи къуллугъчи хьана. Бажарагълу алимди вичин уьмуьрдин цIуд йисар махсус функцийрин вычисленияр, математический таблицаяр ахтармишуниз гана.
1961-йисуз академик А.А.Дородницынан регьбервилик кваз “Гьисабунар кьадай математикадин ва математический физикадин журнал” тешкилай чIавуз Мавлуд Керимоваз гьа журналдин кьилин редактордин заместителдин къуллугъ теклифна. КIвалахдин рекьяй юлдашрин гафаралди, журнал гьисабунар кьадай математикадин рекьяй дуьньяда кIвенкIве жергейра хьуник чи машгьур ватанэгьлидин лайихлу пайни ква.
“Лезги газетдин” редакциядин коллективди Мавлуд Керимовичан хизандиз, багърийриз, дериндай хажалат чIугуналди, башсагълугъвал гузва ва абуруз хьанвай магьрумвилин дерт пайзава.
«Лезги Газет»
