Сулейман-Стальский райондин центральный больницадиз фейила, са шумуд касди заз духтур, аялрин невролог  Сюзанна  Тельмановна  Темирхановадикай  разивилин келимаяр лагьана ва адакай газетдиз макъала кхьин тIалабна.

Зун С.Темирхановади кIва­лах­­завай кабинетдиз фена. Анин  ракIарихъ аялар гвай гзаф дишегьлияр галай. “Районда медицинадин рекьяй куьмек кIанзавай аялрин кьадар гзаф яни?” — хабар кьуна за духтурдивай.

— Исятда чна са йисал къведалди яшда авай аялрин дис­пансеризация тухузва, гьавиляй аялар гвай дидейрин кьадарни гзаф я, — чи суалдиз жаваб гана Сю­занна Тельмановнади. — Йи­къа чна, юкьван гьисабдалди, 40-45 аял кьабулзава, абурун сагъ­лам­вал ахтармишзава, лазимвал авайбуруз медицинадин рекьяй куьмекар гузва. Аялрин сагъламвиликай рахайтIа, йисалай-суз абурун кьадар артух, аялар кьинин дуьшуьшар тIимил жезва.

Зун С. Темирхановадихъ галаз мукьувай таниш хьана. Ада 1982-йисуз ЦIийи поселокдин юкьван школа, 1988-йисузни ­Да­­гъустандин государстводин медицинадин институтдин пе­ди­атриядин факультет акьал­тIарна. 1989-йисалай ада рай­он­дин центральный больницада кIвалах­зава, сифтедай ам реанимациядин отделенидин заведующий тир, гуьгъуьнлай аялрин духтур невролог хьана.

Намуслу зегьметдиз килигна 2001-йисуз С. Темирхановадиз “Дагъустан Республикадин здравоохраненидин отличник” лагьай тIвар гана.

Чаз малум хьайивал, Сюзанна Тельмановнади духтурвилин пе­ше дуьшуьшдай хкянач. И пе­ше­дал ам 40 йисалай виниз духтур яз кIвалахзавай, эхиримжи йисара райондин центральный больницадин кьилин духтурдин заместителдин жавабдар ве­­зифаяр гьакъисагъвилелди кьилиз акъудзавай диде Ракъуят Сул­талиевна Гъаниевади ашу­кьарна.

— Гьеле школада кIелзавай йисара за кьатIана хьи, зи дидеди тамамарзавай кIвалах инсанриз герекди ва гьуьрмет авайди я, — лугьузва Сюзанна Тельмановнади. — Гьавиляй за дидедин рехъ давамарун, инсанриз герек пешедин иеси хьун кьетIна. Инсанрин сагъламвал хуьзвай ва мягькемарзавай пешедин иеси хьунал къе за шадвални, дамах ийизва.

Чун кабинетда ихтилатрик квайла, аниз аялар гваз атай дишегьлияр лацу халат алаз патав гвай столдихъ ацукьнавай жегьил руша кьабулзавай. Атайбурухъ галаз ширин мецелди рахазвай жегьил духтур акурла, за Сюзанна духтурдивай “И милайим руш гьинай я?” лагьана хабар кьуна.

— Ам зи руш Назрин я, ада медуниверситетда кIелзава, чи больницадиз практикадиз хтанвайди я, — жаваб гана С.Темирхановади.

Назрина чаз лагьайвал, ада Санкт-Петербургдин медицинадин педиатриядин университетда 6-курсуна кIелзава.

Гьа са вахтунда, сифте курсунилай эгечIна Н.Темирхановади медицинадин университетдин общественный кIвалахрани активвилелди иштиракзава. Хъсан къилихдин, ширин мез авай лезги рушаз муаллимрин студентрин арада лайихлу гьуьрметни ава.

Адахъни университет акьал­тIарайдалай гуьгъуьниз хайи рай­ондиз хкведай ва больницада вичин бадединни дидедин кар давамардай фикир ава.

Эхь, якъин хьайивал, дух­тур­вал и хизандин пеше я. Ин­сан­рин сагъламвал хуьнин­ къа­ра­вулда акъваздай мум­кинвал хьу­нал абуру шадвални­ ийизва.

 

Хазран Кьасумов