3-августдилай Зуль-Хиджа варз алукьнава. Мусурманар патал адахъ еке важиблувал ава. И варз, бязи крарал гьалтайла, къадагъа эцигнавайбурукай сад я. Мисал яз, Аллагьди Зуль-Хиджа вацра дявеяр тухун къадагъа авунва.
Пак кхьинрай малум жезвайвал, вацран сифтегьан цIуд йикъахъ иллаки еке къиметлувал ава. Жабира агакьарайвал, Мугьаммад Пайгъамбарди ﷺ икI лагьана:
“И дуьньядин винел виридалайни лайихлу йикъар Зуль-Хиджа вацран сифте цIуд югъ я”. И гьадисдиз баянар ганвай диндин алим Ибн Хаджар Аль-Аскаляниди “Фатх Аль-Бари” ктабда кхьизва: “И вацран сифтегьан цIуд йикъахъ чIехи дережа хьунин себеб и йикъара Аллагьдиз икрам авунин виридалайни кьетIен адетар сад авунихъ галаз алакъалу я: капI (суварин капI), сив хуьн, садакьа гун, гьаждал фин. Икрам авунин и адетар санал кьилиз акъудзавай маса йикъар мад авач”.
Алимри тестикьарзавайвал, Зуль-Хиджа вацра, иллаки сифте йикъара, гунагьривай къерех хьана, хъсан, къени кIвалахар авунихъ, садакьаяр гунихъ, сивер хуьнихъ, сувабдин маса кIвалахар авунихъ еке метлеб ава.
Къейд ийин хьи, и вацра пак йикъарикай сад яз гьисабзавай Арафдин югъ ава. И юкъуз сив хвейи касдиз Аллагьди кьве йисуз сивер хвейила жезвай кьван сувабар кхьизва. Мадни, а касди кьве йисан къене рехъ ганвай вири гунагьрилайни гъил къачузва. Лагьана кIанда, гьаждал фенвай касдивай и юкъуз сив хуьн тавуртIани жеда.
Играми мусурманар! Аллагьдин захавилихъ сергьятар авач. Зуль-Хиджа вацра и кар нубатдин сеферда тестикьарзава. И вацра мусурманри Къурбанд суварни къейдзава. «Лезги газетдин» редакциядин коллективди вири мусурман стхайризни вахариз и чIехи сувар рикIин сидкьидай мубаракзава. Къуй куь хъсан крар, дуьаяр, садакьаяр Аллагьди кьабулрай. Амин!
«Лезги газет»
