РД-дин образованидин ва илимдин министерстводи хабар гузвайвал, “Земский муаллим” программада иштиракиз кIанзавайбурун кьадар гьеле гила амаз 30 касдилай алатнава.
Земский, яни хуьруьн чкайра муаллимар хьун патал арзаяр кьабулун гьеле давам жезватIани, мукьвал тир вахтунда и кар акьалтIарда, гьикI лагьайтIа программада иштиракун патал алай йисуз анжах 50 кас хкядайвал я.
Дагъустан Республика и проект кьилиз акъудунин кар гъиле кьунвай сифтегьанбурукай сад я. Программадин шартIарин бинедаллаз, адан иштиракчияр тир муаллимри хуьруьн чкада 5 йисалай тIимил тушир вахтунда кIвалахун лазим я. Абурукай гьар садаз хкянавай райондин мулкунал кIвал маса къачун (ва я авай кIвал аваданламишун) патал 1 миллион манат пул гуда.
Министерстводи къейдзавайвал, республикадин педагогикадин вузрин выпускникри проектдиз еке итиж ийизва. Районрин властар лагьайтIа, неинки жегьил пешекарар кьабулиз, гьакIни абуруз хуьруьн чкада яшайиш кьезиларун, къулай шартIар тешкилун патал алава тир куьмек гуз гьазур я.
Проектда педагогвилин кIвалахдин тежриба авай ва яш 50 йисалай виниз тушир, Дагъустандай, гьакIни Россиядин маса регионрай тир пешекарривай иштиракиз жеда. Арзаяр электронный почтадай — uoo@dagminobr.ru. — кьабулзава. Жуван тIварцIелай ва алакъа жедай делилрилай гъейри, чарче кIвалахзавай чка ва къуллугъ, образование ва яшамиш жезвай чка къалурун лазим я.
Къейд ийин, республикада, санлай къачурла, 500-далай артух муаллимрин кьитвал ава. Асул гьисабдай бес тежезвайди къецепатан уьлквейрин чIаларин (240), математикадин ва физикадин (50-далай артух) муаллимар я. Алай вахтунда муаллимрин патахъай еке кьитвал Буйнакский, Дахадаев, Къарабудахкент, Къизляр, Табасаран, Къайтагъ, Хив, Рутул, Тлярата ва ЦIумада районра ава.
2020-йисуз 9-классар акьалтIарзавай аялри къецепатан уьлквейрин чIаларай ГИА, 2022-йисуз 11-классар акьалтIарзавайбуру ЕГЭ вахкун лазим тирди фикирда кьурла, муаллимар бес тахьунин месэла иллаки хцидаз элкъвезва. Гьаниз килигна, эхиримжи йисара республикада жегьил пешекарар хуьрериз желб авун патал и ва я маса серенжемар кьабулиз эгечIнава.
КIвалахдин къулай шартIар ва лайихлу мажиб. Дагъустанда муаллимдин пешедиз майилвал авуниз таъсирзавай терефар гьа ибур я. Ватанда пешекарар бес жезвачтIани, алатай йисуз республикадай тир 7 муаллим кIвалахун патал яргъал тир Тажикистандиз фенай. Тажикрин терефди вичел муаллимар яшайишдин кIвалералди таъминарунин ва 100 доллардилай виниз тир бинедин мажиб гунин мажбурнама къачуна. Идалайни гъейри, гьар вацра 60 агъзур манат пул абуруз РФ-дин образованидин ва илимдин министерстводи гузва. КIелунин йис алатайдалай кьулухъ саки вири муаллимри школайрихъ галаз кутIуннавай икьраррал амал авун давамарна ва кьвед лагьай йисуз акъваздай къарар кьабулна.
Къейд ийин, алай йисуз Россиядин муаллимриз неинки Тажикистандиз, гьакI Къиргъизистандизни эвер гузва. Идалайни гъейри, эхиримжи йисара ихьтин теклифар Китайдай ва Монголиядайни къвезва. Бязи чкайриз фин патал анин чIал чир хьунин шартIни эцигзавач.
Амина Муслимова
