7-сентябрь. Россиядин МВД-дин къенепатан кьушунрин подразделениярни Дагъустандин СОБР Буйнакский райондин Къарамахи хуьруьн къерехриз гьахьна, куьчейра женгер тухузва. Экстремистри Гамиях, Шумия, Ахар, Тухчар ва Новолакский хуьрерин даяхдин пунктар кьунва.
8-сентябрь. Федеральный къуватри Кадардин зонадин кьакьан чкаяр кьунва. Владивостокдай Дагъустандиз Приморскдин ОМОН-дин хъсан гьазур хьанвай 50 аскер рекье туна.
10-сентябрь. Ракетайрай ягъунар кьунин нетижада боевикрин Чабанмахида авай пункт тергна. И хуьр азад хъувуна.
11-сентябрь. Новолак районда боевикри кьунвай 5 хуьруькай сад азад хъувуна. Новолак, Тухчар, Чапаевское хуьрер патал женгер кьиле физва. Къарамахида боевикрин 150 касдикай ибарат десте элкъуьрна кьуна. Чабанмахи азад хъийидайла, 50 боевик тергна. Снайперрин 6 десте, женгинин суьрсет авай кьве склад тергна.
12-сентябрь. Къарамахи хуьруьн кьилел Россиядин пайдах хкажна. Чабанмахини федеральный къуватрин гуьзчивилик акатна. Дагъустан Республикадин Госсоветдин, Федеральный къуватрин командованидин къарардин бинедаллаз экстремистриз аксивалдай женгинин гьерекатра иштиракун патал виликрай Афгъанистанда къуллугъ авур Дагъустандин агьалийрин рота тешкилна.
13-сентябрь. Кадардин вири зона МВД-дин къенепатан кьушунрин гуьзчивилик кутуна.
14-сентябрь. Федеральный кьушунри Кадардин зонада агалкьунралди женгинин гьерекатар кьиле тухвана. 10 юкъуз боевикри кьунвай Новолак хуьр азадна.
15-сентябрь. Дагъустандай чукурнавай бандитри республикадин территорияда терактар тешкилдай махсус дестеяр гьазурзава.
16-сентябрь. Дагъустандин силисдин органри 4-сентябрдиз Буйнакскда теракт тешкилунай (нетижада 64 кас телеф хьайи) шак физвайбур жагъурун малумарзава. Къизляр ва Бабаюрт районра боевикрин цIийи отрядар тешкилзава. Махачкъалада республикадин Халкьдин Собранидин сессия кьиле фена. Анал Дагъустанда вагьабизм къадагъа авунин месэла гьялна.
Чи мухбир
