2-августдиз  республикадин муниципалитетрихъ галаз хьайи видеоконференциядал РД-дин Премьер-министрдин заместитель — образованидин ва илимдин министр Уммупазиль  Омаровади образованидин идараяр кIелунин цIийи йисаз гьазур хьанвайвал ахтармишна, хабар гузва ми­нистерстводин пресс-къуллугъди. Къейд ийин, республикада, санлай къачурла, 1462 мектеб ва школадиз фидай яшдив агакь тавунвай аялрин 836 идара ава.

Вице-премьерди къейд авурвал, кIелу­нин цIийи йисаз гьазурвал акунин сергьятра аваз еке кIвалах тухузва, амма къенин йикъан делилралди, чIехи пай шегьерра ва районра са жерге месэлаяр гьял тавуна амазма.

Республикадин вири муниципалитетра­ кIелунин цIийи йисаз гьазурвал акунвай образованидин идараяр кьабулдай  комиссийри кIвалахзава. Россиядин МЧС-дин РД-да авай Кьилин управленидин, РД-дин МВД-дин, Роспотребнадзордин Управленидин, республикадин образованидин ва илимдин, гьакIни здравоохраненидин министерствойрин векилрикай ибарат тир абуру  школаяр вири патарихъай мукьуфдивди ахтармишзава. Сифтени-сифте фи­кир санитариядин истемишунрал, хатасузвилин къайдайрал амал авуниз гузва. ГьакI­­ни ремонтдин ва яшайишдин кIва­ла­хар кьиле  тухузвай тегьердал гуьзчивалзава.

У.Омаровади  муниципалитетрин кьилеривай  тухузвай кIвалахдал кьетIен гуьзчивал авун ва нукьсанар вахтунда арадай акъудун патал  тади гьалда серенжемар кьабулун тIалабна. «Вахт йикъаралди ваъ, сятералди физва. Сифтени-сифте  ха­тасузвилин месэлаяр фикирда кьуна кIан­да — абур виридалайни важиблубур я. Графикда къалурнавай месэлаяр кьилиз акъуд­завай гьал ахтармишун патал ихьтин совещанияр чна  гьафтеда садра тухуда. И месэлаяр, къейд ийин, республикадин руководстводин  гуьзчивилик ква», — лагьана ада.

Совещанидал  министрди образованидин хиле кьетIен гуьзчивилик квай маса месэлайрикайни лагьана. Кьилди къачур­тIа — школайра авай медицинадин кабинетриз лицензияр къачуникай, школайра кIел­завай аялар санай масаниз тухунин хатасузвал таъминарун гьамиша гуьзчивилик хьуникай, “150 школа” проект уьмуьр­диз куьчуьрмишуникай.

ИкI, малум хьайивал, алай вахтунда кIва­лахдал машгъул жедай ихтияр гузвай  лицензияр къачунвай медицинадин  кабинетар республикадин 92 школада ава. Мад 353 мектебди — Роспотребнадзордиз ва 52 школади здравоохраненидин министерстводиз лазим тир документар ага­кьар­на­ва.  Совещанидин вахтунда У.Омаровади бязи муниципалитетар и рекьяй кIва­­лахдик йигинвал кутунин патахъай тагькимарна.

Школайрин автобусар рейсиниз экъечI­­­далди вилик ахтармишунин шар­тIа­рикайни рахана. РД-дин образованидин ва илимдин министерстводин делилралди, 12 муниципалитетдихъ и кIвалах тамамардай ихтияр гузвай лицензияр авач. Ам къачун патал пешекарриз лазим тир чирвилер гана, шоферди ички хъванватIа ахтармишдай алат (алкотестер), санэпиднадзордай лазим документ къачуна кIан­зава.

Идалайни гъейри, муниципалитетрин кьилерал рекьерин хатасузвилин ва рекье­рал аялриз хасаратвилер хьунин вилик пад кьунин кIвалах артухарун, школайра кIелзавай аялар рекьерин гьерекатдин жегьил инспекторрин отрядриз желб авун тапшурмишнава.

10-августдалди республикадин муниципалитетри РД-дин образованидин ва илимдин министерстводиз гьар са объектдиз талукь яз тамамарнавай кIвалахрин гьахъ-гьисаб агакьарун лазим я. Республикадин чирвилер гудай идараяр кIелунин цIийи йисаз гьазур хьунин гьакъиндай делилар РФ-дин просвещенидин министерстводин сад тир сиягьда твада.

«Лезги газет»