Мукьвара “Дагъустандин сетрин компания” АО-дин кьиле Владимир Сыщиков тайинарна. Идакай “Дагъустан” РИА-ди хабар гузва. РикIел хкин, виликдай и карханадиз Муртазали Гитинасулова регьбервал гузвай.
АО-дин коллектив цIийи руководителдихъ галаз танишарунин мярекатда “Россети Северный Кавказ” компаниядин генеральный директор Виталий Иванова, РД-дин Гьукуматдин Председателдин заместитель Владимир Лемешкоди ва и хилен жавабдар маса къуллугъчийри иштиракна.
Къейд ийин хьи, цIийи къуллугъдал тайинардалди Владимир Сыщиков “МРСК Центр” — “Тамбовэнерго” ОАО-дин кьиле авай. Вичин зегьметдин рехъ ада электромонтердин пешедилай гатIунна.
Виталий Иванова вичин рахунра къейд авурвал, Дагъустандин сетрин компаниядин регьбердин вилик са шумуд месэла акъвазнава. Абурукай виридалайни кьилинди электричество чуьнуьхзавайбурухъ галаз женг чIугун ва республикадин мулкарал электрикдин симерин къурулуш къайдадик кутун я. “Россети Северный Кавказ” компаниядин директордин гафаралди, Владимир Сыщиковахъ и рекьяй хъсан тежриба ава. Ада виликдай регьбервал гайи кархана регионда сад лагьай чкадал хьуни и кардин гьакъиндай шагьидвалзава.
“Россети” ПАО-ди кьиле тухузвай кIвалахрин сергьятра аваз чара авунвай пулдин такьатар менфятлудаказ ишлемишуниз кьетIен фикир гана кIанда. Алай вахтунда Дагъустанда электрикдин къурулушдин вири эменни ахтармишзава, 2020-йисалай республикадиз алава пулдин такьатарни ахъайдайвал я”, — лагьана ада.
Мярекатдин сергьятра аваз республикадин электрикдин симерин къурулушдиз талукь са жерге маса месэлаяр веревирдна.
Къейд ийин хьи, 5-августдиз РД-дин Гьукуматдин Председатель Артем Здуновани “Россети Северный Кавказ” компаниядин гендиректор Виталий Ивановахъ ва “Дагъустандин сетрин компания” АО-дин цIийи регьбер Владимир Сыщиковахъ галаз гуьруьш кьиле тухвана.
«Лезги газет»
