Дагъустанда йисан эхирдалди модулдин 15 ФАП ачухда. Абур эцигдай чкаяр тайинарна­ва, чилни чара авунва. ФАП-ар кардик ку­ту­нин такьатар, “Здравоохранение” милли проектдин региондин “Медицинадинни сани­тариядин сифте куьмек еримлу авун” проект­ уьмуьрдиз кечирмишунин сергьятра аваз, федеральный бюджетдай рекье тунва.

Модулдин ФАП-ар, адетдинбурулай тафаватлу яз, фад эцигиз жеда. Ихьтин дараматар мобильныйбурун жергедик акатзава, абур заводдин шартIара арадал гъизва ва майдандал ачардивди къайдадик кутазва.

“Шаксуз, райондин здравоохраненидин эвелимжи хел ихьтин модулралди мягькема­руни медицинадинни санитариядин рекьяй куьмек гунин кар еридин жигьетдай цIийи де­режадиз акъудда, республикадин агьалийриз­ медицинадин куьмек гунин мумкинвилер аква­дайвал артухарда. Им чи кьилин тапшу­ругъри­кай сад я”, — къейдна РД-дин здравоохраненидин министр Жамалудин Гьажиибрагьимова.

ФАП-ар гъвечIи хуьрера пайда жеда, месела, Чечень островда, Ахцегь райондин Цуругърин, Чеперин хуьрера, Ахвах райондин — Лологонитль, Маштада, Ботлих райондин — Кижани, Миарсо,  Гуниб райондин — Хоточ, Лак райондин — Кубра, Ури, Мукар, Табасаран райондин — Гувлиг, Гуми, ЦIумада райондин — Цедатль, ЦIунти райондин — Вициатли ва Эльбок хуьрера.

Модулдин медицинадин пунктар герек тир вири тадаракралди таъминарда ва абур алай аямдин истемишунрив кьурбур жеда. ФАП-дин дарамат азарлуяр кьабулдай, абур сагъарунин серенжемар кьиле тухудай, михьивилердай, медицинадин тадаракар хуьдай ва маса  кьилдин утагърикай ибарат я.

Чи мухбир