5-августдиз Мегьарамдхуьруьн райондин администрацияда архитектурадин, эцигунрин ва ЖКХ-дин отделдин кIвалахар веревирд авуниз талукь совещание кьиле фена. И гьакъиндай Инстаграмда авай муниципалитетдин администрациядин кьил Ф.Агьмедован чини хабар ганва.

«Къенин совещанидал архитектурадин, эцигунрин ва ЖКХ-дин отделдин кIвалах веревирдна. И хел важиблуди, виниз тир жавабдарвал истемишзавайди я. Къанунарни дегиш жезва, и хиле кIевелай вилив хуьнин чарасузвал авай истемишунар пайда жезва. Эвелимжи тапшуругъар кьилиз акъуд тавуртIа, кIвалахар энгел жеда. Гьавиляй ихьтин макъамра гьар са къуллугъчидин кIвалахдин нетижалувални гьакъисагъвал гзаф важиблу я», — кхьенва райондин регьберди.

И хиляй авунвай кIвалахдин гьакъиндай совещанидал отделдин директор М.Бегова ихтилатна. Веревирдер авурдалай кьулухъ, кьилиз акъуднавай кIвалахар бес тежезвайбур яз гьисабна.

ДатIана къанунрал амал авунилай гъейри, райондин кьили жавабдар ксар хуьрерин администрацийрин кьилерихъ галазни алакъалувилелди кIвалахунин патахъай тапшурмишна.

Гуьгъуьнлай бязи проектрайни программайрай районда кьилиз акъудзавай кIвалахрикай ихтилат кватна. Кьилди къачуртIа, «150 мектеб», проектдай, «Алай аямдин шегьердин шартIар тешкилун» программадай кьиле тухузвай кIвалахар веревирдна, жавабдар ксарин гьахъ-гьисабрихъ яб акална.

Эхирдай налогар кIватIунин месэла гьикI кьиле физватIа, гьадакай ихтилат кьиле фена, райондин регьберди хъувуна кIанзавай крарин патахъай талукь ксариз тапшуругъар гана.

«Лезги газет»