6-августдиз Сулейман-Стальский райондин кьил Н.Абдулмуталибова райадминистрациядин жавабдар са жерге къуллугъчийрихъ галаз санал Гуьне пата «150 мектеб» проектдай ва «Алай аямдин шегьердин шартIар тешкилун» программадай ремонтдин кIвалахар кьиле физвай объектрал кьил чIугуна. И гьакъиндай «Лезги газетдиз» райадминистрациядин пресс-къуллугъди хабар гана.

Чешмедин делилралди, Шихидхуьруьн мектебда алай йисуз РД-дин Кьил В.Васильеван «150 мектеб» проектдай кIвалахар давам жезва. ТIвар кьунвай мектебдин дарамат райондин виридалайни куьгьнебурукай сад я, ам 1920-йисалай кардик ква. Мектеб кардик акатай чIавалай инихъ аниз тамамвилелди кьиле тухвай ремонт акунвач. Алатай йисуз лагьайтIа, «100 мектеб» проектдин сергьятра аваз, и мектебдин дараматдин къав ремонтна,  дакIарар ва гьахьдай рак цIийибуралди эвезна. А чIавуз Шихидхуьруьн мектеб патал райондин администрацияди 400 агъзур манатдин кьадарда аваз алава такьатарни жагъурнай. Райондин кьиле акъвазнавайбуру яваш-яваш и мектеб тамамвилелди ремонтун кьетIнава.

Гуьгъуьнлай Н.Абдулмуталибов кьиле авай десте Испик хуьруьз фена – ина «Алай аямдин шегьердин шартIар тешкилун» программадай ял ядай багъ абадунин кIвалахар кьиле физва. Алай вахтунда сквердин сергьятар жугъундалди кIевирунин, чиле бетон ва плита тунин кIвалахар кьиле физва. Ана видеогуьзчивилин камераярни тайинардайвал я.

Н.Абдулмуталибова жавабдар ксариз кьиле физвай кIвалахрин гьакъиндай гьар юкъуз шикилрин жуьреда гьахъ-гьисаб гунин буйругъ гана.

«Лезги газет»