27-июлдиз Ахцегь райондин КьакIарин хуьре чIехи шейх Ярагъ Мегьамедан тIварцIихъ диндин чирвилер гунин, гьакIни жегьилар сагълам уьмуьр кечирмишунал, спортдал желб авунин мурад-метлебдин гурлу межлис хьана. Ам райадминистрациядин, РД-дин милли сиясатдин ва динрин крарин рекьяй министерстводин изиндалди районда республикадин Муфтиятдин векил, Ахцегьрин жуьмя мискIиндин имам Абдулашим гьажидин куьмекчи Гьуьснидин гьажи Ашуралиева ва КьакIарин хуьруьн имам Уьзеир гьажиди тешкилна ва кьиле тухвана. Мярекатда РД-дин милли сиясатдин ва динрин крарин рекьяй министрдин заместитель Мурад Шафиева, республикадин Духовный Управленидин векил, карчи Абдулатиф Дагъларова, Кьиблепатан Дагъустандин са жерге районринни хуьрерин имамри, Махачкъала, Дербент шегьеррай атанвай мугьманри, КьакIарин жемятди иштиракна.
Межлис пакаман сятдин 10-далай хуьруьн майдандал спортдин милли жуьрейрай (гъилер кьун, цIил чIугун, путар хкажун, чIемерукрай лишанар ягъун…) акъажунар кьиле тухунилай башламишна. Нисинихъ лагьайтIа, мярекатдин тешкилатчийри мугьманриз суфраяр ачухна. Спортдин акъажунар сятдин 6-далди давам хьана, сятдин 7-даз абур СП-дин дараматдин вилик квай ял ядай багъда диндин межлисдиз кIватI хъхьана.
— Гьуьрметлу кьакIавияр, мугьманар, къе чна шейх Ярагъ Мегьамедан экуь къамат рикIел хуьниз талукьарна тешкилнавай межлис квез мубаракрай! Къуй чи ватанда ислягьвили, мублагьвили цуьк акъудрай! — ихьтин гафаралди межлис Гьуьснидин гьажи Ашуралиева ачухна.
— Къе гзафбуруз, гьайиф хьи, чи девлетлу тарих чизвач. И межлис тухуналди чна гьа нукьсан туькIуьр хъувунихъ кам къачузва. Зи кьулухъ галай шикилдай (макъаладин 1-шикил) аквазвайди Кавказда муьридизмдин бине эцигай зурба алим, Дагъустандинни Чечнядин имамрин руьгьдин регьбер Мегьамед Ярагъи, и кас лагьайтIа, Дагъустандинни Чечнядин сад лагьай имам, Ярагъ Мегьамедан езне Гъазимугьаммад я. Патав Ярагъ Мегьамедан муьрид, машгьур имам Шамил, адан патавни Ярагъ Мегьамедан хтул, зурба алим, тарихдин “Асари Дагъустан” ктабдин автор Алкьвадар Гьасан эфенди гва. Ахцегьар Ярагъ Мегьамедан муаллим хьайи Магьарам эфенди хьтин ксарин, маса зурба алимрин макан я. Гила сифте гаф Къуръан кIелун патал чна Ярагъ Мегьамедан неве, гьафиз Саид Мугьаммадаз гузва. Яшдиз гъвечIи ятIани, дережадиз ам пара чIехи я — къейдна ада.
Хуралай еке устадвилелди Каламдин сураяр кIелайдалай кьулухъ, вязеринни суьгьбетрин арайра, майдан Махачкъаладай атанвай Надият Абдурагьмановадин гъилик квай аялрин “Хайрат” дестедин ва мавлид кIелзавай жегьилрин ихтиярда твазвай. Абурун ширин сесерин маналу нашидри межлисдин иштиракчияр гьейранарзавай.
Микрофондихъ Сулейман-Стальский райондин имам, чи дин ва чIал хуьзвай “Ас-салам” газетдин редактор Гьасан гьажи Амаханов атана.
— Диндин чирвилерикай ихтилат физвай ихьтин мярекатар сувабдинбур я. Къуръанда чаз “икъра”, яни кIела лугьузва. Алимри, пайгъамбаррин варисар яз, чун дуьз рекье твазва. “Гьар са тухумдиз са алим хьуй” лугьудай бубайрин мисал ава. Инсан кьейила, анжах пуд шей амукьзава: чирвилер авай хъсан велед, куьтягь тежер садакьа (рехъ-хвал… туькIуьруникди жезвай) ва ада несилриз тазвай чирвилер. Гьавиляй алимривай дуьз чирвилер къачун чи везифа, буржи я, — лагьана ада.
— Эхиримжи вахтунда республикадин кьиле авай ксарин куьмекдалди РД-дин Муфтиятди чкайрал жегьилрин арада диндин, эдеб-ахлакьдин ва спортдин серенжемар кьиле тухуниз еке фикир гузва, — лагьана шаз республикада тухвай кадрийрин резервдин конкурсдин гъалибчи, Дагъустанда милли сиясатдин ва динрин крарин рекьяй министрдин заместитель, кьакьави Мурад Шафиева. — Къе хуьре жегьилар и крарал желбунин мураддалди мярекатар тешкилай ва абура иштиракай куьн вири сагърай! Чи бубайрин адетар, ислам дин кьиле тухунин карда инсанриз са манийвални авач. Квез чидатIа, Махачкъаладин кьилин майдандал алай мискIинда Гьукуматдин дережадин къуллугъчийрини ибадат ийизва. Кьилинди ам я хьи, чи ният-фикирар михьибур хьана кIанда…
Межлисдал насигьатрин келимаяр Усугъчай хуьруьн имам Алихан гьажиди, Дербентдай атанвай Нурудин гьажиди ва маса юлдашрини лагьана. Межлис кьиле тухузвай Гьуьснидин Ашуралиева и юкъуз тешкилай спортдин серенжемрин нетижаяр кьуна ва кIвен-кIвечи чкаяр кьур ксариз талукь тир дережайрин грамотаяр, медалар ва пулдин премияр гана. Эхирдай хуьруьн имам Уьзеир гьажиди диндин межлис тухуз куьмек гунай ва адан серенжемра активнидаказ иштиракунай хуьруьнвийриз, мугьманриз чухсагъул малумарна.
Къуй Аллагьди и межлис кьабулрай, адан суваб-берекат себеб яз, КьакIарин хуьре, вири районда гьуьрмет, секинвал, берекат артух хьурай!
Дашдемир Шерифалиев
