И йикъара Ахцегь райондин администрацияда МР-дин кьилин заместитель Алмас Шуаева жавабдар къуллугъчийрихъ галаз гьафтедин совещание кьиле тухвана. Идакай «Лезги газетдиз» райадминистрациядин пресс-къуллугъди хабар гузва.

Налогар кIватIунин, чилер ва объектар актуализация авунин месэлайрин гьакъиндай экономикадин, чилерихъ ва эменнидихъ галаз алакъалу отделдин начальник Мегьамед Кьасимова ихтилатна. Кьилди къачуртIа, ада планар тамамарнавайдакай, налогар 100 процентдин кIватIнавайдакай хабар гана.

Совещанидал администрациядин крар идара ийизвайди тир Вадим Агъасиевазни гаф гана. Ада райондин хуьрера яшамиш жезвай гзаф аялар авай хизанрин сиягь туькIуьрнавайдакай малумарна.

Гуьгъуьнлай А.Шуаева «150 мектеб» конкурсда иштиракай мектебрин директорривай гъиле кьунвай ремонтдин кIвалахар гьи дережада аватIа, гьадакай хабарар кьуна.

Эцигунрин ва сад тир заказчикдин управленидин начальник Мусабег Гьажиева «150 мектеб» проектдай мектебра кьиле физвай ремонтдин кIвалахрикай ихтилатна. Вичин нубатда А.Шуаева мектебра кьиле физвай ремонтдин кIвалахрал гьар юкъуз гуьзчивал тухунин гьакъиндай буйругъ гана. Малум хьайивал, ремонтдин кIвалахар 1-сентябрдалди акьатIарун лазим я.

РД-дин хуьруьн майишатдин министерстводи такьатар чара авунин программадай кьиле тухун патал пландик кутунвай проектрин гьакъиндай райондин хуьруьн майишатдин управленидин пешекар Леонард Атлуева суьгьбетна.

Нубатдин совещанидин кIвалах винидихъ къейднавай месэлаяр гьялуналди куьтягь хьана.

«Лезги газет»