Эдебиятдинни художественный милли чIалал акъатзавай “Са­мур” журналдин 3-нумра кIел­­­дайбурув агакьна. Адаз юбиляррин нумра лагьайтIани жеда. КIелзавайбурун фикирдиз ина 80 йис тамам хьунихъ галаз ала­къа­лу яз шаирар Нариман Къарибовакай, рагьметлу Тажидин Агьмедхановакай ва 70 йисан яшдив агакьнавай писатель Фейруз Беделовакай макъалаяр ва абурун эсерар теклифнава.

Пуд авторни хсуси хатI авай ксар я. Абуру милли эдебиятда кье­тIен чкани кьунва. ГьикI ла­гьай­­­тIа, гьар сада вичин бажарагъдикай, алакьунрикай халкьдиз хийир хкатдайвал менфят къачуна ва къачузва, рикIел аламукьдай, ин­сандин руьгьдин дамарар юзурдай шиирар, гьикаяяр, поэмаяр, повестар яратмишзава.

Журнал Дагъустандин халкь­дин писатель Абдуселим Ис­маилован “Къалп дуьньядин режиссер…” макъаладилай ачух жезва. Авторди чи арайра гилани  гьукумдин  сиясатдиз акси, аскердин партал алайбуруз душманриз хьиз килигзавай, Россиядин халкьдивай ЧIехи Гъалибвилин пайдах къакъудиз кIанзавай­бу­рун тереф хуьзвай “режиссёрар” амукьунал гьайиф чIугвазва.

Шаир Зульфикъар Къафланова “Дидеди-аялдикай, гуьлледи ажалдикай фикирда” рубрикадик кваз вичин цIийи шиирар теклифзава. Куьруь шиирра авторди инсандин ва адахъ галаз алакъада авай яшайишдин, тIе-биатдин, азадвилин, магьрумвилин, лайихлувилелди яшамиш хьунин ва кьиникьин темаяр къарагъарзава.

Писатель Нариман Ибрагьимован “Зегьерлу кьисас” по­вестдин сифте пай ганва. Автор алай аямдин демократиядин, ­ба­зардин экономикадин азадвилер пара ганвай девирди чи  инсанриз гьикI таъсир­наватIа, гьам, гьакIни намусдин, гъейратдин,  гьахълувилин вилик инсанвилин ерияр, итимвилин лишанар хуьз жезвани, авачни ачухариз алахънава.

Гьажи Ильясов кIелзавай­бу­руз журналист, эдебиятдин критик, таржумачи хьиз чида. Гьа са вахтунда ам хъсан гьикаятчини я. И нумрада адан гъиликай хкатнавай “КIандатIа хъуьрухъ, кIан­датIа шехь” новеллаяр — Да­гъус­тандин лайихлу художник Сейфедин Сейфединован суьгьбетар — ганва.

“Публицистика” паюна “Дяведин балаяр” тIвар алаз Абдуселим Исмаилова философиядин илимрин доктор, ДГУ-дин профессор, “РФ-дин кьилин пешекарвилин образованидин гьуьрметлу къуллугъчи” Муслимов Са­лигьакай  очерк чапнава.

Нумрада хъвер квай шейэрал рикI алайбуруз кIелдай къаравилиярни ава.

Абад Азадов