Кьурагь райондин Аладашрин хуьре юкьван образованидин школадин цIийи дарамат эцигунин кIвалахар гьеле 1995-йисуз башламишнай. Амма 320 аялдиз чка жедай ам эцигунин кIвалахрин чIехи пай (70%) тамамарнавайтIани, 2011-йисуз михьиз акъвазарна. Гьа чIавалай алай йисалди объектдал эцигунрин кIвалахар мад давамар хъувуначир. Анжах и мукьвара мад гъиле хкьунва, хабар гузва муниципалитетдин администрациядин пресс-къуллугъди.
Школадин дараматдал кIвалахар кьиле физвай тегьердикай эцигунрин бригададин руководитель — “Техстрой Махачкала” ООО-дин участокдин начальник Саид Пирмегьамедова суьгьбетна.
Школадин дарамат эцигун давамарун патал 2019-йисуз 40 миллион манат чара авунва. И такьатрихъ чирвилер гудай корпусда эцигунрин кIвалахар давамарда ва спортдин зал эцигна куьтягьда.
“Дараматдин патав гвай чкайра къайда туниз, тIуьнрин блокдиз, актовый залдиз, 1,5 километрдин жугъун эцигуниз такьатар чара авунвач. Объектдал эцигунрин кIвалахар тамамдаказ куьтягьдай эхиримжи вахт 2019-йисан 30-декабрь яз тайинарнава. Эгер чун и вахтуналди вири крар ийиз агакь тавуртIа, школа ишлемишиз 2020-йисан сентябрдалди вахкуда”, — лугьузва мастерди. Ада гьакIни къейд авурвал, ина тади гьалда 3 фазадин электротрансформатор эцигунин чарасузвал ава – ам галачиз объектдал сваркадин кIвалахар тамамариз жезвач.
Эцигунарзавайбуруз ял ягъун, кIвалахун патал лазим вири шартIар тешкилнава.
***
Кьурагь райондин образованидин идарайра кIелунин цIийи йисаз гьазурвал акунихъ галаз алакъалу ремонтдин кIвалахар кьиле физва. Идакай муниципалитетдин администрациядин пресс-къуллугъди хабар гузва.
Райондин администрациядин векил и йикъара Кьурагьрин 2-нумрадин юкьван школадиз мугьман хьана. КIвалахар кьиле физвай тегьердикай адаз школадин директордин майишатдин рекьяй заместитель Зафидин Мусаева суьгьбетна.
“Са гьафте вилик чун ремонтрин кIвалахрив гатIунна. Хейлин крар ийиз алакьнава. Вири классрин цлар асуннава, ширер янава. Школадин директордин кабинетда ремонт авунин кIвалахар кьиле физва, ина чиле тунвай куьгьне хьанвай тахтаяр дегишарзава”, — къейдна ада.
2-нумрадин школа федеральный “Алай аямдин школа” проектдик кутунва ва ремонтдин кIвалахар райондин администрациядин гьисабдай тамамарзава. И проект себеб яз школада информатикадин, технологиядин ва шахматрин цIийи кьве кабинет ачухда. И кабинетар лазим жуьреда тадаракламишун патал и йикъара мебель агакьардайвал я.
“Эгер пландик квай муькуь крарни и жуьреда тамамариз алакьайтIа, ремонтдин вири кIвалахар чна 25-августдалди куьтягьда”, — лугьузва Зафидин Мусаева.
«Лезги газет»
