Федеральный “Алай аямдин школа” проект уьмуьрдиз куьчуьрмишунин сергьятра аваз кIелунин цIийи йисуз  республикадин 168 школадин бинедал  образованидин “Точка роста” центраяр ачухда. Абурун арада Ахцегьрин умуми об­разованидин  2-нумрадин юкьван школани ава, хабар гузва муниципалитетдин  администрациядин пресс-къуллугъди.

Россиядин просвещенидин министерстводин талукь тир сиягьда къалурнавайвал, абур чирвилер гунин алай аямдин комплексдалди таъминарда. Санлай къачурла, 1,6 миллион­ манатдин къимет авай и комплексдик  интерактивный тадаракар, мобильный класс, 3D-принтер, компьютердик кутаз жедай ва интернетда сейр ийиз куьмек гудай тадаракар, квадрокомптер, фотоаппарат, видеокамера, рикIизни жигерриз та­лукь къутармишунин кIвалахар чирун патал тренажер-мане­кен, хирер-кьацIар гьихьтинбур жедайди ятIа чирдай имитаторар ва гзаф кьадар маса шейэр ква.

Ийизвай кIвалахрин кьетIенвилериз килигна, центр са шу­муд чкадикай ибарат жеда: чирвилер гудай кабинетрикай  (“Технология”, “Математика  ва  информатика”, “Физическая культура ва яшайишдин хатасузвилин бинеяр”) ва коворкингдин (жуьреба-жуьре крарал машгъул ксари са чкада кIва­лахун) къайдада туькIуьрнавай, шахматрал къугъвадай чкани,  медиотекани авай  проектрин зал.

Алай вахтунда Ахцегьрин школада, программадин истемишунар кьилиз акъудун патал классар ремонт авунин кIва­лахар худда кьиле физва.

РикIел хкин,  “Алай аямдин школа” проектдин сергьятра аваз  гуманитарный ва рекъемрин хилериз талукь тир “Точки роста” цетраяр  уьлкведин  шко­­лайра 2019-йисан 1-сентябрдилай уьмуьрдиз  куьчуьрми­шиз  башламишда. И проектдин­ асул макьсад шегьеррин ва хуьрерин школайрин арада авай фаркь тIимиларун, хуьрерин чкайра кIелзавай аялриз  чирвилер къачунин карда шегьерра авайбуруз хьтин шартIар тешкилун я.

Чи мухбир