И мукьвара Дербент шегьердин “Нарын-Къала” стадиондал кьуд лагьай сеферда футболдай “ТЕФИ-2019” кубок патал жаванрин международный турнир кьиле фена. Ана 2006-2007-йисара  дидедиз хьайи, ДЮСШ-ра  вердишвилер къачузвайбурун 6 командади иштиракна.

Къугъунар къизгъиндаказ кьиле фена. Дербент шегьердин “ТЕФИ” командадин жаван футболистри вири къугъунар агалкьунралди кьиле тухвана (тренер — Ибрагьимпаша Султанов). Вири командаяр вад сеферда женгиник экечIна. “ТЕФИ”-дин футболистри, къаршидиз экъечIай вири командайрин винел гъалибвал къазанмишуналди, сад лагьай чка кьуна. 2 — чкадиз Махачкъала шегьердин — “Сокол-2006”, 3 -чкадиз — Баку шегьердин “Нефтчи”, 4-чкадиз Каспийск шегьердин “Нур”, 5-чкадиз Владикавказ шегьердин “Юность”, 6-чкадизни гьа и шегьердин “Алания” командаяр лайихлу хьана.

Акъажунрин нетижайрал асаслу яз, лап хъсан футболистар, тренерар, судьяяр ва турнирдин тешкилатчияр тайинарна. Виридалайни хъсан тренер Каспийск шегьердин “Нур” командадин тренер Гьашимов Руслан яз гьисабна. Турнирдин вири призерриз ва хъсан футболистриз кубокар, медалар, дипломар, грамотаяр ва къиметлу призар гана. Наградаяр футболистрив ва  тренеррив Дербент шегьердин футболдин ветеранри вугана. Тренерри, футболистри, абурун диде-бубайри ва футболдал рикI алай вирида футболдай международный турнирдин кьилин спонсор коммерциядинди тир “ТЕФИ” фирмадиз, адан регьбе­рар Тельман Гьамзаеваз ва Физули Сагуеваз гьар йисуз финансрин рекьяй турнирдин тереф хуьнай чухсагъул малумарна­.

Тофик Мирзеханов