23-июлдиз Дагъустандин Кьил Владимир Васильева яшайишдин месэлайриз талукь совещание кьиле тухвана. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана. Кьилди къачуртIа, мярекатдин сергьятра аваз республикада “Земский доктор” проект кьилиз акъудзавай гьалар веревирдна.
И месэладай гегьенш доклад РД-дин здравоохраненидин министр Жамалудин Гьажиибрагьимова авуна. Ада къейд авурвал, здравоохраненидин къурулушдин еридин дережа сифте нубатда и хел медицинадин рекьяй бес кьадар тадаракралди таъминарунилай, духтуррин пешекарвилелай аслу я. Хуьруьн чкада авай больницаяр лазим кьадарда пешекарралди таъминарунин карда “Земский доктор” проектдихъ еке важиблувал ава.
“И программа кьилиз акъудзавай эхиримжи 5 йисан къене Дагъустандин 1080 духтур кIвалахдал желбнава. Гекъигун патал: 2018-йисуз республикадин здравоохраненидин хиле, санлай къачурла, 10233 касди кIвалахзавай, абурукай 3408 пешекарди — хуьруьн чкада”, — къейдна ада.
РД-дин Минздравдин кьилин гафаралди, алай вахтунда хуьруьн чкада 421 пешекардин игьтияж ава. Гзафни-гзаф терапевтар, педиатрар, рентгенологар, фтизиатрар, реаниматологар, анестезиологар ва масабур бес жезвач.
Ж.Гажиибрагьимова алава хъувурвал, “Земский доктор” проектдин сергьятра аваз алай йисуз хуьруьн чкада 224 духтурни 10 фельдшер кIвалахдал желбдай фикирар ава. Къенин юкъуз лагьайтIа, гьелелиг 52 духтурни 7 фельдшер рекье тунва.
“Земский доктор” программадин сергьятра аваз хуьруьн чкада кIвалахзавай духтурривай хабарар кьурла, малум хьайивал, хуьре кIвалах давамарун патал абур чкадин администрацийрин патай куьмекдихъ муьгьтеж я. Мисал яз, къуллугъдин кIвалер чара авун, яшайишдин рекьяй маса серенжемар. Ихьтин крари хуьрериз кIвалахиз хъфенвай духтурар гьана амукьун патал ашкъиламишдай.
РД-дин Минздравдин кьилин докладдиз баянар гудайла, Владимир Васильева жегьил пешекарар хуьруьн чкада кIвалахунал желб авунин месэладиз кьетIен фикир гун буйругъна.
Чи мухбир
