Алай йисан 22-июлдиз 41 йисан яшда аваз милли хабаррин “ЛезгиЯР” портал арадал гъайи машгьур журналист Рамил Микаилов рагьметдиз фена.
Интернетда кардик квай лезги сайтрин арада 2009-йисуз Рамиль Микаилова арадал гъайи портал Урусатда, Азербайжанда ва чи ватанэгьлияр яшамиш жезвай маса уьлквейрани сейлибурукай сад я. И порталдилай гъейри, хабаррин проектрин гъавурда хъсандиз авай пешекарди “ЛезгиСпорт” сайтни кардик кутуна. Къенин юкъуз и ресурсди интернетда авай спортдиз талукь Кавказдин сайтрин арада кIвенкIвечи чкайрикай сад кьазва. 2013-йисуз и проект “Прометей” интернет-премиядизни лайихлу хьана.
Вири и крар Рамил Микаилова масабурун куьмек галачиз хсуси такьатрихъ кьилиз акъудна. И карди адан чIехи ватанпересвилин гьакъиндай шагьидвалзава.
Гьайиф хьи, Рамил Микаилован сагъламвилин гьал хъсанзавачир. И кар себеб яз ам чи арадай акъатна. Лезги сайтар арадал гъайи алакьунар авай пешекар Азербайжандин Хачмаз райондин Мукьтадир поселокдин сурара кучукна.
“Лезги газетдин” редакциядин коллективди Рамил Микаилован хизанриз ва багърийриз, дериндай хажалат чIугунивди, башсагълугъвал гузва. Адан экуь къамат чи рикIера амукьда.
«Лезги газет»
