Ислен юкъуз Махачкъала шегьердин Хушет поселокда лезги халкьдин векилри кьил кутуналди эцигиз гатIунай имам Аш-Шафиидин тIварунихъ галай мискIин ачухна. И кардиз талукьарнавай диндин мярекатда РД-дин милли сиясатдин ва динрин крарин рекьяй министр Энрик Муслимова, Дагъустандин Хатасузвилин Советдин секретардин заместитель Сефербег Гьамидова, республикадин Муфтийдин заместителар тир Агьмад Къагьаевани Шамил Алиханова, илимдин, жемиятдин векилри, динэгьлийри иштиракна.
Мярекат мискIиндин имам, вичин ери-бине Мегьарамдхуьруьн райондай тир Тажидин гьажи Къазибегова ачухна ва кьилени тухвана. Аллагьдин кIвал эцигунин карда мергьяматлувал къалурай гьар са касдиз ада чухсагъул малумарна.
“Ина республикада халкьарин арада дуствал, стхавал, ислягьвал, Аллагьдин дин хуьнихъ галаз алакъалу яз кьиле тухузвай кIвалах давамарда. За шейх Агьмад Афандидиз, мярекатда иштиракзавай вири юлдашриз сагърай лугьузва. Къуй чун диндал мягькем хьурай…”, — лагьана Тажидин гьажи Къазибегова.
Гуьгъуьнлай рахай Агьмад Къагьаева РД-дин Муфтийдин тIварцIихъай мискIин ачухун мубаракна ва диндин тешкилатрихъ, идарайрихъ са акьван секин тушир алай девирда ислягьвал хуьнин, акьалтзавай несилар дуьз рекье аваз тербиямишунин карда авай важиблувал къейдна. Ада гьакIни мярекатдин иштиракчийриз насигьатдин суьгьбетар авуна ва мусурман вичин хивевай везифайрив жавабдарвилелди эгечIна кIанзавайдакай лагьана.
“Ислам диндиз мусурманри чеб тухузвай тегьердиз килигна къимет гузва. Гьавиляй чун гьар са карда чешне къалуриз алахъна кIанда”, — алава хъувуна А.Къагьаева.
Энрик Муслимова миллетрин арада дуствилин алакъаяр хьунин карда диндин тешкилатри кьетIен роль къугъвазвайдакай лагьана. Ада къейд авурвал, республикадин гьукумдин органри Дагъустандин диндин управленидихъ галаз сих алакъаяр хуьзва, гьикI хьи, кIвалахдин жигьетдай кьве терефдихъни умуми месэлаяр ава.
“Бязибуру мискIинар гьикьван эцигдайди я, мектебар, аялрин бахчаяр эцигайтIа, хъсан я лугьузва. Къейдна кIанда, мискIинар хьиз, республикада образованидин идараярни эцигзава, и месэладиз кьетIен фикир гузва. Шазалай кардик квай “100 мектеб” проектди и кардин гьакъиндай шагьидвалзава. Шад жедай кар я ам я хьи, мектебар, аялрин бахчаяр эцигунин карда мумкинвилер авай кьилдин ксари, меценатрини иштиракзава. Аферин чпиз. Къуй чи гьар садан хъсан крар Аллагьди кьабулрай”, — лагьана Э.Муслимова.
Агьмед Магьмудов
