Шикилдай аквазвай набататдиз векьерин тар лугьузва. Адахъ тарцин хьтин яцIу тан ва 1 метр кьван ва мадни яргъи пешер жеда. Ксанторрея Австралияда, Тасмания островда ва анрин патарив гвай бязи маса островра гьалтда. Ам ламувал квай, гьакI кьурагь чкайрани экъечIда.
Ксанторреядин тан — лап явашдиз, амма пешер фарашдиз чIехи жеда. Зегьер квай и набататдин яшар 600 йисав кьван агакьда. Гзаф чими, кьурагьвал авай мулкара цIаяр кьунин дуьшуьшарни мукьвал-мукьвал жезватIани, ксанторреядивай цIуз хъсандиз дурум гуз жезва. Пешер лагьайтIа, гьасятда цIийибур эхкъечIда. И набататдин шкьакьдикай лак арадал гъидайла менфят къачузва. Австралияда адал “кенгурудин тум” тIварни акьалтнава. Ксанторрея гьамиша къацу набататрин жергедик акатзава.
Гьазурайди — Куругъли Ферзалиев
