Зи ихтилат алай вахтунда Москвадин областдин Красногорск шегьерда яшамиш жезвай медицинадин са шумуд хиляй алакьунарни чирвилер авай тежрибалу духтур Барият Девлетовна Камалдиновадикай я.
Ам 1965-йисан 5-августдиз Докъузпара райондин Миграгърин хуьре дидедиз хьана. Анин мектебда са йисуз кIелайдалай кьулухъ хизан Каспийск шегьердиз куьч хьана. Ана 8-класс куьтягьай ам медучилищедик экечIна. Анаг яру дипломдалди куьтягьна. КIелунар медуниверситетда давамар хъувуна, гьа са вахтунда Каспийск шегьердин азарханада кIвалахни авуна.
Кьве йисуз Махачкъалада вузда кIелайдалай кьулухъ ам цIийиз арадал атай хизандихъ галаз Саратовдиз куьч хьана, амма кIелун гадарнач. Бариятан уьмуьрдин юлдашди Саратовдин военный медицинадин факультетда кIелун давамарна. Вуз куьтягьайдалай кьулухъ уьмуьрдин юлдаш кIвалахун патал Самара шегьердиз рекье туна. Барията и шегьердин мединститутда кIелун давамар хъувуна.
1994-йисуз Самарадин институтдин военный медицинадин факультет куьтягьайдалай кьулухъ адаз Санкт-Петербург шегьердиз кIвалахал фин теклифна. 1996-2002-йисара къизгъин гьалара Владикавказда 58-армияда къуллугъ кьилиз акъудна. 2002-йисуз оборонадин министрдин буйругъдалди Бариятан хизан Москвадин областдиз рекье туна. Амма сагъламвилин гьал пайгардик тахьуни Барият Камалдиновадиз 2006-йисалай къуллугъ давамардай мумкинвал хганач. Эхиримжи 6 йисуз, 2013-йисалай эгечIна, Барият вичин сагъламвилихъ хъсандиз гелкъвена, агалкьунарни хьана. Вичин сагъламвал гуьнгуьна хтунилай гъейри, ада масабурузни куьмекар гузва. Гьакъикъатдани, ада “Фейсбук” соцсетда медицинадин рекьяй мукьвал-мукьвал метлеблу къейдер, теклифар, меслятар раижзава.
Барията цIийи жуьредин медицинадин къайдайрикай гегьеншдиз менфят къачун важиблу яз гьисабзава. Мисал яз, ада къейдзавайвал, дарманар галачиз, недай няметрин куьмекдалдини пешекарвилелди сагъламвал хъсанардай мумкинвал ава.
“Духтурди гьамиша вичин дережа хкажун, чирвилерни тежриба артухарун лазим я. За алай девирдин медицинадин вини дережадин къайдайриз кьетIен фикир гузва. Халкьдин медицинадилай гъейри, илимдин рекьелди эгечIзавай халкьдин медицинани ава”, — лугьузва Барият духтурди.
Курсант тир чIавалай кIвалахиз эгечIай Барият къуллугъдин рекьяй лайихлу дережайриз хкаж хьана, исятда ам медицинадин къуллугъдин подполковник, военный психоневролог, женгерин гьерекатрин ветеран я. Ада дяведин къизгъин чкайра психиатрвиле, госпиталдин неврологический отделенидин начальниквиле кIвалахна.
Алай вахтунда официальнидаказ кIвалахзамачтIани, медицинадин сирер хуралай чизвай Барият духтурди эхиримжи йисара немсерин “фитлайн” продуктдихъ галаз кIвалахзава, адакай инсандин сагъламвал хъсанарунин рекье еке менфят хкатзавайдакай вичин тежрибада субутарни авунва. Ам медицинадин жигьетдай куьмек герекзавайбуруз гьамиша гъил яргъи ийиз гьазур мергьяматлу духтур я. Духтуррин хизанда хвани руш чIехи хьанва. Абурухъ кьве хтул ава. Къуй абурун мурадар кьилиз акъатрай.
Куругъли Ферзалиев
