Гзафбурун рикIел аламайвал, 2017-йисуз “Россия 1” телеканалда кьиле фейи “Аламатдин инсанар” передачада 6 йисан яшда авай Руслан Сафарова математикадай вичин кьетIен алакьунар къалурнай. Кьилди къачуртIа, экрандилай къалурзавай четин тапшуругъриз ада легьзейрин къене жавабар гузвай. Гъиле калькулятор авай касдилай ада фад жавабар гуни вирибур гьейранарзавай.
Еке алакьунар авай гъвечIи алим-математик КцIарай тир лезги бала я. Гзаф акьул, хци кьатIунар авай аялдиз вундеркинд лугьуда. Ихьтин аялар тек-туьк жезва. Гьа са вахтунда хци кьатIунар авай аялрихъ галаз кIвалах авун, абуруз мумкинвилерни шартIар тешкилун эвелимжи буржарикай я. И жигьетдай Руслан Сафарован бахтуни гъана — ам бубадин гуьзчивилик кваз математикадал машгъул хьана, телефондин куьмекдалди махсус приложенийрикай менфят къачуна.
Русланахъ и мукьвара мад са чIехи агалкьун хьана: математикадай кьиле фейи международный олимпиадада ада къизилдин медаль ва Сингапурда кьиле фидай олимпиадада иштиракунин сертификат къазанмишна.
Руслан чна винидихъ тIвар кьур теле-шоуда иштиракайдалай кьулухъ машгьур хьана.
“Телеканалдай передача къалурай пакадин юкъуз неинки КцIара, гьакI санлай вири Азербайжанда, интернетдин майданрани Руслан машгьур хьана. За аялдиз гьамиша кьетIен зегьмет чIугун, жувал алахъун герек тирди лагьана. Аквазвайвал, гила ада и кар хъсандиз гьисснава”, — лагьана еке алакьунар авай Русланан буба Фуад Сафарова.
Азербайжандиз хтайлани, адаз фикир гайибур хьана. Са меценатди адаз Бакуда кардик квай машгьур “Landau Scool” мектебда кIелдай мумкинвал гана. Багърийри Руслан гьахълудаказ чпин дамах яз гьисабзава. Гележегда программиствилин пеше хкядай фикир авай гадади и хилени зегьмет чIугвазва.
Телевиденидин программайра иштиракун патал Китайдайни, масанрайни теклифар атана, амма, Фуад Сафарова ихтилатзавайвал, анриз фидай мумкинвал хьанач.
Хуш кардал рикIивай алахъзавай, къастунал кIевивалзавай бажарагълу аялдилай исятдани, гележегдани вирибуру чешне къачун герек я. Вич «инсан-калькулятор» яз гьисабзавай Русланахъ идалай кьулухъни зурба агалкьунар къазанмишдай вири жуьредин мумкинвилер хьурай!
К. Ферзалиев
