“Лезги газетдин” чиниз дуьньядин хабарар акъудун патал эхиримжи кьвед-пуд йисуз за федеральный дережадин чешмейрикай гзаф менфят къачуна. И муддатда США-ди, гьакI РагъакIидай патан уьлквейри Россиядихъ галаз авур векъи рафтарвилер, мукьвал-мукьвал малумарай санкцияр вирибуруз ашкара я.
ЦIийи миллетбазар себеб яз, Украинада фад ва я геж чалпачух гьалар арадал атун мумкин тирди парабуру виликамаз кьатIанвай. Тажуб жедай карни авач: мидяйри Украинадин мулкар саки яракьрин жебеханадиз элкъуьрнава. Гьахълудаказ лугьун: къенин девир, югъ вирибурук къалабулух квайди я.
РФ-дин Президент В.Путина Украинада махсус серенжем тухунин патахъай малумарайдалай инихъ варз алатнава. Чи уьлкве мумкин тир хата-баладикай хуьнин макьсаддалди кьиле тухузвай серенжемди РагъакIидай патан уьлквейрик еке тIурутIум кутуна, кьилди къачуртIа, чпин терефриз жезвай зарардикайни фикир тийиз, илитIзавай кьван санкцийрин а кьил амач. Гьа са вахтунда абуру Украинадин патахъай гуя чIугвазвай “къайгъударвал” гьихьтинди ятIа, вирибуруз ашкара хьанва. Сифте нубатда — махсус серенжем себеб яз.
НАТО-дик экечIунин еке «иштагьар» авайтIани, ам намумкин кар тирди къе В. Зеленскийди хиве кьазва. Делилри тестикьарзавайвал, ам гьа сифтедилай чарадан макьамдал кьуьл ийиз вердиш хьайидаз ухшар я. Россиядиз, гьакI Украинадизни гьакъикъи мидявал къалурзавай терефри Украина чпин яракьралди таъминарунин макьсад адаз халисан дуствилин куьмек гунихъ галаз алакъалу туш.
Инал Америкадин терефдин патахъайни къейд ийин хьи, США-дин къенин регьберди тухузвай сиясат мидявал авунихъ галаз алакъалу тирдакай Америкадин машгьур хейлин векилри хабар гузва. Мисал яз, виликан президент Д.Трампа Байденан амалар акьулсузданбур яз гьисабзава.
Вацран муддатда чи аскерри Россиядин ватандашрин хатасузвал патал викIегьдаказ женг чIугвазва. Жезвай зиянрин, телефвилерин патахъай рекъемралди якъин делилар анжах РФ-дин оборонадин министерстводи раижзава. Гьа са вахтунда Украинадин бязи миллетбазри, журналистри интернетдин майданра къалп малуматар чукIуруниз рехъ гузва, россиявийриз акси экъечIуниз, гужар авуниз эвер гузва.
Интернетдай датIана тапан малуматралди миллетрин арада къал твазвай, Россиядин агьалийрикай, аскеррикай вичин нифретлувилелди якъин тушир делилар раижзавай Украинадин миллетбаз журналист Д.Гордоназ талукь яз и йикъара РФ-дин СК-ди пуд статьядай уголовный дело къарагъарна. Ада Москвадин туьквенрин дезгеяр ичIи хьун вичин мурад я лугьузва. Ихьтин фикир лугьузвайдаз анжах акьалтIай миллетбаз лугьуз жеда.
РФ-дин СК-ди тестикьарзавайвал, Гордона Украинадин телеканалдин эфирда Россиядал яракьар гваз гьужумуниз, ядерный яракьар ишлемишуниз, агьалияр къирмишуниз эвер гана. Миллетбазвилин таблигъат ада “Ютубда” авай вичин хсуси каналдани кьиле тухузва. Эллерин арада футфа твазвай, тапан малуматар гегьенш къатариз чукIурзавай инсанар виридалайни хаталу я.
К.Ферзалиев
